Saida Mirziyoyeva pedagoglar bilan bo‘lgan uchrashuvda so‘nggi vaqtlarda maktab ta’limi sohasida olib borilayotgan islohotlarni e’tirof qildi.
Jumladan, boshlang‘ich sinflar uchun mo‘ljallangan yangi darsliklar haqida fikr bildirdi.
«Bu o‘quv yilidan boshlab, boshlang‘ich sinf darsliklari tubdan yangilandi. 4 yil davomida yaratilgan bu darsliklar Finlandiyadagi nufuzli tashkilot tomonidan ekspertizadan o‘tkazilib, maxsus sertifikat oldi. Bu degani, Finlandiya darsliklarimizni sifatli va talabga javob beruvchi deb tan oldi. Xudo xohlasa ushbu kitoblar mazmuni, sifati, dizayni va rang-barangligi bilan barchaga ma’qul bo‘ladi» , dedi u.
Shuningdek, Saida Mirziyoyeva o‘qituvchilarning zamonaviy bilim va qo‘nikmalarni qunt bilan o‘zlashtirib, qolgan hamkasblariga ham ularni yetkazishiga umid bildirdi.
«Siz aziz ustozlar zimmasida yangi metodikani qunt bilan o‘rganib, uni boshqa o‘qituvchilarga tarqatishdek mas’uliyatli vazifa turibdi. Sizdan ushbu yangiliklarni qo‘llab-quvvatlashingizni, ularni boshqalarga ham targ‘ib qilishingizni so‘rab qolamiz. Zero, har qanday islohot ko‘pchilik bilan, birgalikda, kelishib amalga oshiriladi. Yagona kuch bo‘lib bajarilgan har qanday ish katta natija beradi. Bu ishlarda omad sizlarga doim yor bo‘lsin».
