«Murakkab taqdirli, lekin iste’dodli inson edi» - Putin Prigojinning o‘limini bilvosita tasdiqladi

RF prezidenti Vladimir Putin Tver oblastida yo‘lovchilari orasida «Vagner» XHK asoschisi Yevgeniy Prigojin ham bo‘lgan Embraer samolyoti halokati yuzasidan ilk bor gapirdi. Putin qurbonlarning oilalariga hamdardligini bildirgan. U yo‘lovchilar orasida Rossiyaning Ukrainaga qarshi urushida «ulkan hissa qo‘shgan» xususiy harbiy kompaniya xodimlari ham bo‘lganini qayd etgan. Yevgeniy Prigojin haqida gapirarkan, Putin u «kerakli natija»ga erishadigan «murakkab taqdirli inson bo‘lgani»ni qayd etgan. Rossiya prezidenti aviahalokat sabablari tergov qilinayotgani hamda oxiriga yetkazilishini ma’lum qilgan. Quyida Putin «DXR» rahbari Denis Pushilin bilan uchrashuv vaqtida samolyot halokati yuzasidan bergan izohi matni to‘liq keltiriladi.

Ushbu aviahalokatga keladigan bo‘lsak, birinchi navbatda, barcha qurbonlarning oila a’zolariga samimiy hamdardlik bildirmoqchiman. Bu har doim fojia. Va haqiqatan ham, dastlabki ma’lumotlar ko‘rsatayotganidek, agar u yerda «Vagner» kompaniyasi xodimlari bo‘lgan bo‘lsa, — shuni ta’kidlashni istardimki, bular Ukrainada neonatsistik rejimga qarshi umumiy ishimizda katta hissa qo‘shgan odamlardir. Biz buni yodda tutamiz va unutmaymiz.

Prigojinni men uzoq vaqtdan buyon, 90-yillar boshidan buyon bilaman. Bu murakkab taqdirli inson edi, hayotda jiddiy xatolari ham bo‘ldi va kerakli natijalarga ham erishdi — o‘zi uchun ham va men bu haqda so‘raganimda, so‘nggi oylardagi kabi umumiy ish uchun ham. U iste’dodli inson, iste’dodli biznesmen edi.

U nafaqat bizning mamlakatda, balki xorijda, xususan, Afrikada samarali ishladi. U yerda neft, gaz, qimmatbaho metallar va toshlar bilan shug‘ullangan. Menga ma’lum bo‘lishicha, kechagina Afrikadan qaytgan va bu yerda bir qancha rasmiy shaxslar bilan uchrashgandi.

Ammo shu mutlaqo aniqki — menga bu haqda bugun tongda Tergov qo‘mitasi hisobot berdi — ular bu hodisa bo‘yicha dastlabki tekshiruvlarni allaqachon boshlashgan. Bu to‘liq amalga oshirilib, oxirigacha yetkaziladi. Ko‘ramiz, tergovchilar yaqin vaqtlar ichida nima deyisharkin. Hozir esa ekspertiza o‘tkazilmoqda — texnik va genetik ekspertizalar. Bunga esa ma’lum vaqt kerak.