Alisher Usmonovning advokati sudda Avstriya gazetasi ustidan qozonilgan g‘alabaga izoh berdi

Milliarder Alisher Usmonov o‘zining go‘yo «oligarx» ekanligi haqidagi har qanday da’volarni «qat’iy rad etadi». Bu haqda biznesmen advokatiga tayanib Forbes xabar berdi.

Advokat Yoahim Nikolaus Shtaynhofel Usmonovning Hamburg sudida Avstriyaning Kurier gazetasi ustidan qozonilgan g‘alabasini shunday izohladi. Nashr o‘z maqolasida tadbirkor Vladimir Putinning «sevimli oligarxi» obro‘siga ega ekanini yozgan edi.

«U [Usmonov] Rossiya prezidentining «sevimli oligarxi» deb atalgan. Buning «dalili» bu da’voni bildiradigan bitta «tvit»dir. Bu bema’nilik va konstitutsiyaviy davlatga loyiq emas», dedi Shtaynhofel.

Twitter (hozir X deb ataladi) Rossiyada bloklangan. Xuddi shu asosda Usmonov ham «oligarx» deb nomlangan. Yevropa Ittifoqi milliarderga nisbatan sanksiyalar qo‘lladi, Hamburg sudi qarori bu cheklovlarning asossizligini yana bir bor ta’kidlaydi, deb hisoblamoqda advokat.

Avvalroq, Usmonov Hamburg sudida Kurier gazetasi ustidan g‘alaba qozondi. Sud gazetaning Usmonov «Putinning sevimli oligarxi sifatida obro‘ga ega» va «Putinning o‘zi uni shunday deb bilishi» haqidagi da’volarini asossiz deb topdi. Sud qaroriga ko‘ra, Usmonovning Yevropa Ittifoqi sanksiyalariga keltirilgan asoslardan birida «Putinning sevimli oligarxlaridan biri» sifatida qayd etilgani bunday da’voni asoslash uchun yetarli emas. Sud Usmonovga nisbatan bunday iboralarni qo‘llash - uning huquqlarini buzadi, deb hisobladi.

Alisher Usmonov Yevropa Ittifoqi sanksiyalariga 2022 yil fevralida, Rossiya tomonidan Ukraina bosqini boshlanganidan keyin tushgan edi. YeI ularga izoh berib, uni «Rossiya prezidenti Vladimir Putin bilan ayniqsa yaqin aloqaga ega oligarx» deb atagan. Usmonov buni rad etmoqda. U Yevropa umumiy yurisdiksiya sudida sanksiyalarning bekor qilinishiga erishmoqchi. Milliarder Rossiyaning eng boy biznesmenlari ro‘yxatida sakkizinchi o‘rinni egallaydi, uning boyligi 14,4 milliard dollarga baholanadi.

Sanksiyalar Usmonovning obro‘siga katta zarar yetkazdi, bu haqda uning o‘zi Corriere Della Sera gazetasiga bergan intervyusida aytdi. Italiyaning Sardiniya orolidagi mol-mulkining muzlatib qo‘yilishi uni xafa qildi: «Do‘stlar o‘zini bunday tutmaydi. Lekin men siyosat nima ekanini tushunaman», dedi Usmonov.

Rossiya rahbariyatining Ukrainadagi urushni boshlash haqidagi qarori to‘g‘rimi yoki yo‘qmi, degan savolga Usmonov «siyosatdan uzoq yurishini» va bo‘linishdan ko‘ra odamlar birlashishi mumkin bo‘lgan sohalarni afzal ko‘rishini aytdi. So‘ngra tadbirkor barcha jangovar harakatlar qurbonlariga hamdard ekanini bildirdi.