Jamiyat | 13:48 / 09.09.2023
23243
4 daqiqa o‘qiladi

Yo‘l-yo‘lakay: bulg‘or qalampiri saralovchilar

Kuz fasliga kelib Rishton tumanining Navbahor qishlog‘idan to Uchko‘prik tumani Sariqqo‘rg‘on qishlog‘igacha yo‘llarda bulg‘or qalampiri qoplayotgan yoki uni quritib sotayotgan dehqonlarga ko‘zingiz tushadi. Oybek Yoqubov Yoyilma qishlog‘ida 60 sotix yerga bulg‘or qalampiri ekkan. Dehqon ayni damda hosilini yig‘ishtirmoqda. Dala ishlariga ishchi ayollarni jalb qilgan.

Bulg‘or qalampiri yetishtirib sotish bilan shug‘ullanuvchi dehqon Oybek Yoqubovning qo‘li qo‘liga tegmaydi

Bulg‘or qalampiri o‘zimizning dehqonchilik. Ko‘chatlarini Rishtonning Jalayer qishlog‘idan donalab sotib olib ko‘klamda ekamiz.

Bu yil ko‘chat narxi biroz ko‘tarildi. 60 sotix yerga 60-65 ming tup ko‘chat ekdik. Mana, hozir pishiq payti keldi, endi esa sotyapmiz. Dehqonchilik mashaqqatli ish. Ancha mehnat qildik yetishtirguncha.

Oybek Yoqubov, dehqon.

Bu yil 60 sotix yerga bulg‘or qalampiri ekdim, boshqa dehqonchiliklarimiz ham bor. Daromad qilish qarashga, qanday o‘g‘it berishga bog‘liq. Yaxshi ishlansa, yaxshi hosil olinadi, albatta. Kunlik ishchilar ishlatamiz, nonushta, tushligini qilib berib, qo‘liga 100 ming so‘mdan beramiz. Ishchilarimiz asosan xotin-qizlardan iborat.

Yangi terilgan bulg‘or qalampiri kilogrammini 3,5-4 ming so‘mdan, quritilganini esa 20-22 mingdan sotyapmiz. Qurug‘ining narxi ozroq tushgani uchun hozir ko‘proq yangisini sotyapmiz. Odatda shu yo‘l chetida quritamiz. Qalampirlarni kesib yoyib qo‘yamiz. 3-4 kun yoki uzog‘i 1 haftada quriydi. Xaridorlar bilan kelishib sotaveramiz keyin. Qolgani ro‘zg‘orga ketadi.

Quritilgan bulg‘or qalampirini asosan Bog‘dodning Mirzaobod qishlog‘idan keluvchi xaridorlar sotib oladi. Ular qayta ishlab kukunini eksport qilishadi. 10 kg ho‘lidan 2-2,5 kg quruq bulg‘or qalampiri chiqadi», – deydi dehqon Oybek Yoqubov.

Shafoatxon Arzamovaning turmush o‘rtog‘i vafot etgan. U ro‘zg‘or tebratish uchun kunlik ishga chiqadi

Shafoatxon Arzamova

«Qishloq ayollari bilan kunlik ishga chiqamiz. Hozir ayni bulg‘or qalampiri mavsumi. Egatlardan terib chiqib, yoyib saralaymiz. Yaxshi, chiroylilari yangiligicha sotiladi, ko‘rinishi uncha yaxshi bo‘lmaganlari esa yoyib quritiladi. Dehqonlarga nechta ishchi kerakligiga qarab kelaveramiz. Tushlik, nonushta qilib berishadi. Ertalab soat olti yarim yoki yettilarda kelib, kechki besh yarimda ishdan chiqamiz. Dehqon qo‘limizga har kuni 100 ming so‘mdan pul beradi.

Biz yoyib berganimizdan keyin qurigach, xaridor kelib olib ketadi, o‘zlari qayta ishlashadi. Bizning ishimiz terib, chiroyli qilib saralab, yoyib berish. Yoyilganlari taxminan 10 kunda quriydi, ungacha paykaldagilar yana pishib qoladi, biz yana teramiz. Bu yilgi narxlar avvalgi yillarga qaraganda ancha past.

Dehqonlar shu holatga keltirguncha ko‘p mehnat qiladi, pul sarflaydi. Lekin narx bu ahvol. 3,5 mingdan ko‘tarmayapti xaridorlar. O‘g‘it falon pul, texnika ham qimmat. Bizning qora qozonni qaynatishga yordam berayotgan shu dehqonlardir, baraka topishsin.

Biz ham oila boqishimiz kerak, bolalarimni yolg‘iz katta qildim. Yoshim 57 da. Imkon bo‘lsa, har kuni chiqaman, sharoit shuni taqozo qiladi. Sog‘liq uchun ham ishlash kerak-da, kayfiyatimiz ham ko‘tarilib ketadi kulgi-askiya qilib», – deydi Shafoatxon Arzamova.

Sarvar Ziyoyev, Kun.uz
Montaj ustasi: Abdusalim Abduvohidov.

Mavzuga oid