Rossiya O‘zbekistonda bir nechta maktab qurmoqchi

Bugun, 18 sentabr kuni Moskvada O‘zbekiston va Rossiya hukumat rahbarlari darajasidagi qo‘shma komissiyaning 4-majlisi bo‘lib o‘tdi.

Uchrashuvda RF bosh vaziri Mixail Mishustin Rossiya tomoni O‘zbekistonda rus tilida va Rossiya dasturlari asosida ta’lim beriladigan bir nechta maktab qurishga tayyorligini bildirdi.

“Shunday qilsak, o‘quvchilar Rossiya madaniyati va an’analari bilan yaxshiroq tanisha oladi. Siz tomoningizdan qiziqish bildirilsa, bu boradagi so‘rovni ko‘rib chiqamiz”, – dedi Rossiya hukumati raisi.

O‘zbekiston bosh vaziri Abdulla Aripov taklif qabul qilinishini aytdi.

“Ta’lim rus tilida olib boriladigan maktablar qurish taklifini katta mamnuniyat bilan qabul qilamiz. Shuni aytishni istardimki, O‘zbekistonda 10 mingdan umumta’lim maktablari bor, ularning 10 foizida rus tilida ta’lim beriladi”, – dedi Aripov.

O‘zbekiston hukumati rahbariga ko‘ra, hozirda O‘zbekistonda Rossiya oliy ta’lim muassasalarining 14 ta filiali faoliyat olib boryapti. Abdulla Aripov ta’lim sohasidagi hamkorlik maktabgacha va maktab ta’limida ham faollashganini aytib, “Klass” loyihasi doirasida O‘zbekistondagi rus tilli maktablar uchun matematika, fizika va kimyo fani pedagoglarini ko‘paytirishni taklif etdi.

Hukumatlararo komissiya yig‘ilishida bir nechta hujjatlar qabul qilindi:

• “Rosatom” va O‘zbekiston Sog‘liqni saqlash vazirligi o‘rtasida yadroviy tibbiyot sohasidagi strategik sheriklik to‘g‘risida anglashuv memorandumi;
• Rossiya Sanoat va savdo vazirligi hamda O‘zbekiston Investitsiyalar, sanoat va savdo vazirligi o‘rtasida kelishuv;
• Rossiya davlat registratsiyasi, kadastr va kartografiya federal xizmati hamda O‘zbekiston Iqtisodiyot va moliya vazirligi o‘rtasida 2023-2024 yillarda davlat kadastr baholashi tizimini yaratish bo‘yicha Rossiya Federatsiyasi tomonidan O‘zbekiston Respublikasiga beg‘araz texnik yordam ko‘rsatish to‘g‘risidagi kelishuv;
• N.I.Pirogov nomidagi Rossiya tibbiyot milliy tadqiqot universiteti Toshkent filialining to‘laqonli faoliyatini tashkil etish bo‘yicha birgalikdagi harakatlarni jadallashtirishga doir rejalar.