Ikki million kishi yashaydigan G‘azo sektori «zarbalar yomg‘iri» ostida qoldi. Fotosuratlar

7 oktyabr tongida Yaqin Sharqda yangi urush boshlandi. HAMAS harakati Isroil bo‘ylab minglab raketalar uchirishdi, qurollangan guruhlar chegarani buzib o‘tib aholi yashash manzillariga hujum qilishdi, yuzlab kishilar o‘ldirildi va garovga olindi (ular orasida tinch aholi vakillari ham, harbiylar ham bor). Bunga javoban Isroil armiyasi G‘azo sektori bo‘ylab o‘t ocha boshladi: 9 oktyabrga o‘tar kechasining o‘zida isroilliklarning raketalari 500 dan ortiq nishon bo‘ylab zarba bergan.

G‘azo sektori rasman Falastinning bir qismi sanaladi, ammo Iordan daryosining g‘arbiy sohilida joylashgan Falastin muxtoriyati ma’muriyati amalda bu hududni 2007 yildan buyon nazorat qilmaydi, o‘shanda bu hududda hokimiyatni HAMAS harakati a’zolari kuch bilan egallab olishgandi. Uning a’zolari soni aniq emas, ammo bu maksimum o‘n ming kishini tashkil etadi. Butun G‘azo sektorida yashovchi aholi soni — AQSh Markaziy razvedka boshqarmasining 2020 yil iyulidagi ma’lumotlariga ko‘ra, ikki million atrofida. Shu bilan birga sektorning jami maydoni — atigi 360 kvadrat kilometrni tashkil etadi, ya’ni bu yer dunyoda aholi eng zich yashovchi hududlardan biri hisoblanadi. HAMAS o‘z harbiy obektlarini to‘g‘ridan to‘g‘ri aholi yashash uylari, masjidlar, maktablar, shifoxonalar yaqiniga joylashtirgan — qisman shunchaki joy yetishmasligi tufayli, qisman isroillik harbiylar bu nishonlarga zarba berishini qiyinlashtirish maqsadida.

Sektor hududidan chiqib ketish juda qiyin: bu yerda aeroport yo‘q, port Isroil floti tomonidan bloklangan, quruqlik bo‘ylab esa Isroildan tashqari Misr tomon yagona o‘tish yo‘li bor. Ammo Falastin pasporti bilan qaysidir mamlakat hududiga o‘tishning o‘zi bo‘lmaydi.

Isroil bosh vaziri Binyamin Netanyahu 7 oktyabr kuni HAMASni yo‘q qilishga va’da bergan va G‘azo sektori aholisini «zudlik bilan ketish»ga chaqirgandi — ammo amalda ikki million kishining ketar joyi yo‘q.