Madinadan ortga qaytarilgan samolyot: unga nima bo‘lgani hamon ma’lum qilinmadi

Ma’lumotlarga ko‘ra, 5R361 reysi bilan Madinaga uchayotgan «Panorama Airways» aviakompaniyasi samolyoti bortidagi 377 nafar yo‘lovchilar asosan Saudiya Arabistoniga umra ziyoratiga ketayotgan qariyalardan iborat.

Samolyot texnik sabablarga ko‘ra uchish aeroportiga qaytishga majbur bo‘lgan. Buning uchun uchoq ikki soatdan ko‘proq vaqt davomida Toshkent atrofida aylanib uchib, yonilg‘isini sarflab tugatgan.

Avvalroq «Uzbekistan Airports» AJ matbuot xizmati Ahmadjon Orifjonov Kun.uz so‘roviga ko‘ra samolyot aynan qanday texnik sabablarga ko‘ra ortga qaytarilgani ma’lum emasligi, kun yakuniga qadar aniq ma’lumotlar e’lon qilinishi aytgan bo‘lsa-da, bu haqda aniq ma’lumot taqdim etilmadi.

Voqea guvohlarining hikoya qilishicha, «Panorama Airways» aviakompaniyasiga xizmat ko‘rsatayotgan, bortida 377 nafar yo‘lovchi va ekipaj a’zolari bo‘lgan samolyot bugun, 27 oktabr kuni soat 10:40 larda Madina shahri tomon parvoz qilib, 13:36 larda Toshkentga qaytib qo‘ngan.

Samolyot qo‘nganidan so‘ng yo‘lovchilarga cuv tarqatilgan. Yo‘lovchilardan biri uchun chaqirilgan «tez yordam» bir soatda yetib kelgan.

«Uzbekistan Airports» AJning ma’lum qilishicha, «Panorama Airways» aviakompaniyasining Toshkent – Madina yo‘nalishi bo‘yicha UZP-361 reysi 28 oktyabrga ko‘chirilgan. Ko‘chirilgan reysning Toshkentdan parvoz vaqti ertalab soat 07:00 ga belgilangan.

«Qalampir.uz» nashri manbasiga ko‘ra, hozir Toshkent xalqaro aeroportida bo‘lib turgan yo‘lovchilar Umra ziyoratini tashkil qilgan o‘ndan ortiq turfirmalar tomonidan mehmonxonalarga joylashtirilgan. «Yo‘lovchilarning Madina shahriga yetib olguniga qadar yuzaga kelayotgan har qanday muammolari va talablari aeroport emas, balki sayyohlik agentliklarining zimmasiga yuklatiladi», deyiladi xabarda.

Qayd etib o‘tish kerak, parvozni amalga oshirgan 9H-SMG qayd etish raqamiga ega Airbus A-330-300 samolyoti Maltaning «SmartLynx Airlines Malta» aviakompaniyasi nomiga rasmiylashtirilgan. U 12 ta biznes va 365 ta ekonom klass o‘rindiqlariga ega. Uchoqning yoshi ham u qadar katta emas — 9,5 yil.

Bundan avval ushbu uchoqdan Malayziyaning «Air Asia», Saudiyaning «Saudi Arabian Airlines», Germaniyaning «Condor», Kanadaning «Air Transat» aviakompaniyalari ham foydalangan.

«Panorama Airways» aviakompaniyasi 2021 yilda tashkil etilgan. Kompaniya yoshi 21,5 yil bo‘lgan bitta Airbus A320-232 samolyotini (UK32050) ro‘yxatdan o‘tkazgan.