Erdo‘g‘an endi Netanyahu bilan muloqot qilmasligini aytdi

«Biz uni unutdik», dedi Erdo‘g‘an.

Foto: Adem ALTAN / AFP

Turkiya prezidenti Rajab Toyyib Erdo‘g‘an endi Isroil hukumati rahbari Binyamin Netanyahu bilan muloqot qilishdan bosh tortishini aytdi.

«Biz Netanyahu bilan endi gaplasha olmaymiz. Biz uni unutdik», deb Erdo‘g‘an so‘zlaridan iqtibos keltiradi Al-Arabiya telekanali.

Uning so‘zlariga ko‘ra, Isroil urushni to‘xtatmasa va «harbiy jinoyatlar va inson huquqlari buzilishi» uchun javobgarlikka tortilmasa, Turkiya dunyo global tizimiga ishonmaydi.

Erdo‘g‘an avvalroq Isroilni G‘azoga qarshi davom etayotgan hujumlarni to‘xtatishga va «aqldan ozish holatidan chiqishga» chaqirgan edi.

Bu so‘zlarga qaramay, Turkiya Isroil bilan munosabatlarni butunlay uzmoqchi emas.

4 noyabr kuni Turkiya G‘azo sektoridagi gumanitar holat fonida Isroildagi elchisi Shokir O‘zkon To‘runlarni «masalahatlashuv» uchun chaqirib oldi.

Tayyorlagan Сардор Юсупов

#Turkiya #Isroil #Binyamin Netanyahu #Rajab Toyyib Erdo‘g‘an

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.