Devid Kemeron kutilmaganda Britaniya siyosatiga qaytdi. Bundan nima kutish mumkin?

Ayni vaqtda britaniyalik siyosatchilar, jumladan sobiq safdoshlari uning Xitoyga nisbatan ehtimoliy pozitsiyasini faol muhokama qilmoqda.

Kemeron bosh vazirlik yillarida Pekinga juda yaxshi munosabatda bo‘lgan, XXR raisi Si Jinpingning davlat tashrifini uyushtirgan va mamlakatga katta miqdorda Xitoy investitsiyalarini jalb etgandi.

Hukumatni tark etganidan keyin ham u Britaniya-Xitoy investitsiya jamg‘armasini tashkil etishga urindi, ammo bunga erisha olmadi.

Yangi tashqi ishlar vaziri va Xitoy o‘rtasidagi bunday iliq munosabatlar, agar, albatta, Kemeron ularni saqlab qolgan bo‘lsa va rivojlantirishda davom etsa, ko‘pchilikda ma’lum xavotirlarni uyg‘otadi.

Ayrimlar bu Britaniyaning Rossiya-Ukraina mojarosidagi pozitsiyasiga ham ta’sir qilishi mumkin deb hisoblaydi.

Konservativ partiyaning sobiq yetakchisi, ser Ien Dunkan Smit esa Kemeronning tayinlanishi – Britaniya «Hongkongda demokratiya talab qilayotganlar va Shinjondagi genotsiddan jabr ko‘rayotganlar»ni himoya qilishdan bosh tortishi haqida Xitoyga berilgan signal ekanini aytdi.

Uning partiyadoshlaridan ayrimlari fikricha, TIV rahbarligiga rozi bo‘lish orqali Kemeron fursatdan foydalanib, o‘z siyosiy faoliyatida boshqacha yakun bo‘lishini ta’minlagan.

«Iste’foga chiqqanda bu hech qachon sening shartlaring bo‘yicha bo‘lmaydi. Ammo agar sen ketsang va qaytsang, nimanidir o‘zgartirishga, boshqacha notada yakunlashga imkon bo‘ladi», – degan Kemeronning sobiq safdoshi, uning hukumatida lavozim olgan baronessa Niki Morgan.

Ammo Devid Kemeronning siyosatga qaytishi o‘zidan ko‘ra hozirgi bosh vazir Rishi Sunakka foyda keltirishi tayin.

Ichki sabablar

Buyuk Britaniyada navbatdagi parlament saylovlariga qadar bir yildan ko‘proq muddat qoldi. Aniq sanasi hozircha ma’lum emas, ammo ular 2025 yil yanvaridan kechiktirmay o‘tkazilishi lozim.

Ijtimoiy so‘rovlar mamlakatdagi mavjud siyosiy va iqtisodiy vaziyatni hisobga olgan holda leyboristlar uchun yaqqol ustunlikni ko‘rsatmoqda.

Bunday vaziyatda Rishi Sunak, aftidan, saylovchilarning bir qismini qaytarish uchun, o‘z partiyasining konservativ qanotini mo‘’tadil siyosatchilar foydasiga mo‘’tadillashtirishga harakat qilmoqda.

Devid Kemeron Konservativ partiyaning mo‘’tadil qanotiga mansub va hamon torilar orasida nufuzli shaxs bo‘lib qolmoqda.

«Bu [Kemeronning tayinlanishi] Sunak amalga oshirishi mumkin bo‘lgan eng katta o‘zgarishdir. Bu partiyani yanada o‘ngga tortayotgan Yevropaga qarshi harakat bostirilganini yaqqol namoyon etadi», – deydi Konservativ partiya faxriysi, Margaret Tetcher va Jon Meydjor kabinetlarida ham ishlagan Maykl Hezeltayn.

Ammo Sunakning hisob-kitoblari ish berishiga kafolat yo‘q, deb hisoblaydi tahlilchilar.

Ularning fikricha, Suella Bravermanning ishdan bo‘shatilishi uning foydasiga xizmat qilishi hamda uni Sunakning partiya ichidagi asosiy muxolifiga aylantirishi, natijada konservatorlar partiyasi rahbarligi uchun keyingi saylovlarda partiyadoshlarning radikal qarashlarga ega bo‘lgan qismi aynan uni qo‘llashi mumkin.