Isroil garovga olinganlarni ozod qilish bo‘yicha HAMAS taklifini rad etdi

Isroil hukumati Qatar vositachiligida Falastinning HAMAS guruhining bir necha kunlik sulh evaziga 50 nafar isroillik ayol va bolani ozod qilish taklifini rad etdi. Bu haqda Isroilning Yediot Ahronot gazetasi yozdi.

Isroil harbiy kabineti 18 noyabrga o‘tar kechasi bo‘lib o‘tgan yig‘ilishda shunday qaror qabul qilgan. Uchrashuv ishtirokchilari garovga olingan oilalarning bir-biridan ajralishi mumkin emas deb hisoblagan. Ular bir oila vakillarining birgalikda ozod qilinishini xohlamoqda.

Nashrning ta’kidlashicha, Isroil hukumati garovga olinganlarning ko‘prog‘ini ozod qilish evaziga G‘azodagi jangovar harakatlarni ham uzoq muddatga to‘xtatishga tayyor. Isroil rasmiylarining qo‘shimcha qilishicha, ular garovga olingan 70-80 kishini ozod qilish bo‘yicha kelishuvni muhokama qilishga tayyor.

Avvalroq, Al-Arabiya telekanali Isroil va HAMAS garovga olinganlarning 50 nafarini shuncha miqdordagi falastinlik mahbuslar bilan almashishga tayyorligini ma’lum qilgan edi.

Yediot Ahronot ta’kidlaganidek, qatarlik vositachilar so‘nggi 24 soat ichida Isroil bilan aloqada bo‘lmagan. Isroil armiyasi G‘azo sektoridagi eng yirik Ash-Shifo shifoxonasida operatsiya boshlaganidan so‘ng, HAMAS vakillari Qatar bilan aloqalarini uzgan. G‘azodagi guruh rahbari Yahyo Sinvarning aytishicha, Isroil armiyasi shifoxonada harbiy operatsiya o‘tkazayotgan bir paytda u muzokara olib bora olmaydi.