Foto: AP / Christophe Ena
Fransiya imperatori Napoleon I Bonapart kiygan shlyapa Fransiyadagi Osenat auksionida 1 mln 932 ming yevroga (2,11 mln dollar) sotildi. Auksion tashkilotchilariga ko‘ra, bu – Napoleon I ning shlyapalari uchun rekord narx.
Bosh kiyim 600-800 ming yevro boshlang‘ich narxda sotuvga chiqarilgan. Bungacha u fransuz sanoatchisi Jan Lui Nuazening kolleksiyasiga kirardi. Xaridor kimligi ochiqlanmayapti. G‘olib tomonidan berilgan 1 932 ming yevro taklifdan oldingi narx 1 884 ming yevro bo‘lgan.
Auksion tashkilotchisining vakiliga ko‘ra, qora rangdagi, o‘ziga xos shaklga ega shlyapa Napoleonning o‘ziga xos belgisi bo‘lgan: u butun umri davomida bunday shlyapalardan qariyb 120 tasini kiygan.
