Ekskavator yordamida qazib olingan qum-shag‘al tosh maydalash va qayta ishlash sexiga tashilgan.
Toshkent shahri, Bektemir tumanidan oqib o‘tuvchi Chirchiq daryosi qirg‘og‘ida 57 ming kub.m. qum-shag‘al noqonuniy qazib olingan. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Qayd qilinishicha, daryo qirg‘og‘idagi muhofaza mintaqasida ekskavator yordamida qum-shag‘al qazib olinib, ushbu hududda joylashgan tosh maydalash va qayta ishlash sexiga tashilgan. Xabarda ushbu korxona nomi keltirilmagan.
«Yashil loyiha» instituti mutaxassislarini jalb qilgan holda qum-shag‘al mahsulotlari qazilgan joyda o‘lchov ishlari olib borilganida 57 ming kub.m.dan ortiq qum-shag‘al noqonuniy qazib olingani, bu bilan tabiatga 35 milliard so‘mga yaqin zarar yetkazilgani ma’lum bo‘lgan.
Holatga huquqiy baho berish, aybdorlarga nisbatan qonuniy chora ko‘rish va tabiatga yetkazilgan zararni undirishda maqsadida to‘plangan hujjatlar Bosh prokuroraturaga yuborilgani aytilmoqda.
