Ukraina Qora dengizdagi «g‘alla yo‘lagi»ni himoya qilish uchun harbiy kemalar oladi

Ukraina prezidenti Volodimir Zelenskiy Kiyevdagi Grain from Ukraine xalqaro sammiti yakunlari bo‘yicha o‘tkazilgan matbuot anjumanida Qora dengizda don ortilgan kemalar xavfsizligini ta’minlash yo‘li topilganini ma’lum qildi.

«Biz hamkorlarimiz bilan kelishib oldik va don tashuvchi kemalar xavfsizligini kafolatlash uchun harbiy kemalardan foydalanamiz. Bizda allaqachon kemalarni qabul qilish bo‘yicha aniq kelishuvlar mavjud. Bu yaqin kelajak masalasi», dedi Zelenskiy.

Ukraina rahbarining so‘zlariga ko‘ra, Odessa viloyati qo‘shimcha havo hujumidan mudofaa tizimlari bilan himoyalanadi, bu borada Ukraina o‘z hamkorlari bilan kelishib olgan.

«Juda aniq komplekslar allaqachon hamkorlar tomonidan yuborilgan va aytishim mumkinki, bu masala allaqachon kelishilgan. Tez orada bu mintaqa juda kuchli havo mudofaasi bilan himoyalanadi. Biz uchun nafaqat kemalar, balki u yerda yashovchi odamlar ham muhim», dedi Ukraina prezidenti.

Zelenskiyning ta’kidlashicha, Ukraina uchun Rossiya ishtirokisiz «don yo‘lagi»ning paydo bo‘lishi yilning eng katta yutuqlaridan biri bo‘ldi.

Iyul oyida Rossiya Qora dengizdagi Ukraina portlaridan don eksporti bo‘yicha «g‘alla bitimi» kelishuvidan chiqdi. Moskva kelishuvlarning Rossiya talablari bilan bog‘liq qismi bajarilmaganini aytdi.

Shundan so‘ng, Rossiya Mudofaa vazirligi Qora dengiz orqali Ukraina portlariga ketayotgan barcha kemalarni «harbiy nishonlar» deb atadi. Bundan tashqari, Rossiya harbiylari Odessa viloyatini, jumladan, kelishuv doirasida foydalanilgan mintaqa port infratuzilmasini o‘qqa tuta boshladi.

Avgust oyida Ukraina rasmiylari Qora dengizda vaqtinchalik yo‘laklar yaratilganini e’lon qilgan edi. Ularning ta’kidlashicha, ushbu yo‘nalishlarda Rossiya harbiylari va minalarga yo‘liqish xavfi saqlanib qolmoqda.