Isroil va HAMAS o‘rtasidagi sulh tugadi, harbiy amaliyotlar davom ettirildi

24 noyabrdan beri amalda bo‘lgan sulh muddati tugadi.

Isroil va HAMAS o‘rtasida 24 noyabrdan beri amalda bo‘lgan va mos ravishda 27 va 29 noyabrda ikki marta uzaytirilgan sulh muddati tugadi.

Isroil mudofaa kuchlari 1 dekabr kuni ertalab G‘azo sektorida jangovar harakatlarni qayta boshlaganini ma’lum qildi.

«HAMAS sulh shartlarini buzdi va Isroil hududini o‘qqa tutdi. Isroil Mudofaa kuchlari G‘azo sektorida HAMAS harakatiga qarshi jangovar harakatlarni qayta boshladi. Isroil G‘azo sektoridagi hamaschilar manzillariga zarba berdi», deyiladi Isroil Mudofaa vazirligi xabarida.

O‘t ochishni to‘xtatish haqidagi kelishuv 24 noyabr kuni kuchga kirdi. Bunga Qatar, Misr va AQSh vositachiligida erishildi. Kelishuv G‘azo sektoriga gumanitar yordam yetkazib berishni va 1/3 nisbatda garovdagilar va mahbuslarni almashtirishni nazarda tutar edi.

Dastlabki kelishuv 4 kunlik otashkesimdan iborat bo‘ldi, keyin kelishuv yana ikki kunga, so‘ngra bir kunga uzaytirildi.

Sulh boshlanganidan beri HAMAS garovga olingan 90 nafar isroillikni, Isroil esa 180 nafardan ortiq falastinlik mahbusni ozod etdi.

#Isroil #Falastin #Hamas

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.