Qashqadaryodagi qo‘riqxonaga o‘rnatilgan videoqopqonga 4 ta noyob qor qoploni tushdi

Qashqadaryo viloyatida joylashgan «Hisor» davlat qo‘riqxonasiga o‘rnatilgan fotoqopqonga bir vaqtning o‘zida to‘rtta noyob qor qoploni tushgan. Bu haqda qo‘riqxona axborot xizmati xabar bermoqda.

«Hisor» davlat qo‘riqxonasining Tanxozdaryo bo‘limi qo‘riqlash xodimi J.Berdaliyev tomonidan o‘rnatilgan foto-videoqopqonlar orqali qor qoplonlarining to‘dasi tasvirga olindi», deyiladi xabarda.

Ma’lum qilinishicha, avvallari ular 1−2 tadan uchrab turgan. Qo‘riqxona hududlarida o‘tkazilgan kuzgi monitoring natijalariga ko‘ra bu yerda 50-52 bosh noyob qor qoplonlari yashayotgani aniqlangan.

Qor qoploni noyob tur hisoblanadi. Uning tana uzunligi o‘rtacha 130 santimetr, dumi 90 santimetr, og‘irligi 75 kilogrammgacha bo‘ladi.

Qor qoplonlarining ko‘rish, eshitish va hidni his qilish organlari yaxshi rivojlangan. Ular har ikki yilda bir marta bolalaydi va 21 yoshgacha umr ko‘rishlari mumkin. Ov qilish uchun o‘ljasiga toshlar orasidan yaqinlashib, 6 metr va undan ham uzoqroqqa sakray oladi.

Qor qoplonlari O‘zbekistondan tashqari Tojikiston, Qirg‘iziston, Qozog‘iston, G‘arbiy Sibir, Janubiy Mo‘g‘uliston, Xitoy, Afg‘oniston, Pokiston, Hindiston, Nepal va Butan kabi sanoqli davlatlarda uchraydi. Hozirda ularning soni 4 500 bosh ekani aytiladi.

Ma’lumot uchun, Vazirlar Mahkamasining tegishli qarori bilan O‘zbekiston Qizil kitobiga kiritilgan hayvonlarni yo‘q qilganlik uchun undiriladigan jarimalar miqdori 10 baravarga, o‘simliklarni o‘sishdan to‘xtash darajasida shikastlantirish yoki yo‘q qilganlik uchun 5 baravarga oshirildi.

Endilikda O‘zbekiston Qizil kitobiga kiritilgan qoplon, targ‘il sirtlon, ilvirs kabi hayvonlar noqonuniy ovlagani uchun O‘zbekiston fuqarolari 3 mlrd 150 mln so‘m, chet el fuqarolari esa 400 ming dollar tabiatga yetkazilgan zararni to‘lashlariga to‘g‘ri keladi. Ro‘yxatdan qushlar, sudralib yuruvchi hayvonlar, umurtqasiz jonivorlar hamda baliqlar ham joy olgan.