Shoygu 2023 yilda «maxsus operatsiya»ning asosiy maqsadi muvaffaqiyatli bajarilganini e’lon qildi

Rossiya Mudofaa vaziri Sergey Shoyguning aytishicha, mamlakat qo‘shinlari 2023 yilga mo‘ljallangan «maxsus harbiy operatsiya»ning asosiy vazifasini uddalagan — Ukrainaning qarshi hujumini to‘xtatgan. 

«Ortda qolayotgan yildagi asosiy sa’y-harakatlar maxsus harbiy operatsiya maqsadlariga erishishga qaratildi. Asosiysi — Ukraina va NATO ittifoqchilari tomonidan baland ovozda e’lon qilingan Ukraina Qurolli kuchlarining qarshi hujumini to‘xtatish edi. Bu vazifa muvaffaqiyatli bajarildi», dedi Shoygu. 

Vazir so‘zlariga ko‘ra, 2023 yilda asosiy vazifaning bajarilishiga bir qancha omillar, jumladan «mudofaa chiziqlarining samarali tizimini yaratish, barcha qismlarning yuqori jangovar qobiliyati, Rossiya harbiy texnikasining ishonchliligi va samaradorligi» hissa qo‘shgan. 

Shoyguning ta’kidlashicha, Rossiya qo‘shinlari o‘z nazorati ostidagi hududlarni barcha yo‘nalishlarda kengaytirmoqda va «doimiy ravishda qulayroq pozitsiyalarni egallab kelmoqda». Vazir so‘zlariga ko‘ra, «front va uning ortidagi umumiy sa’y-harakatlar» jang maydonida tashabbusni qo‘lga kiritishga yordam bergan. 

Ukraina Qurolli kuchlari 2023 yil yozida qarshi hujumni boshladi, unga tayyorgarlik bir necha oy davom etdi. Iyun oyining ikkinchi yarmida Ukraina prezidenti Volodimir Zelenskiy hujum «ko‘ngildagidan sekinroq» ketayotganini aytdi. Dekabr oyida Zelenskiy Kiyev «istalgan natijalarga erishmaganini» tan oldi - qarshi hujum paytida ukrainalik harbiylar hududning faqat kichik bir qismini ozod qilishga muvaffaq bo‘ldi, ikkala tomon ham jiddiy yo‘qotishlarga duch keldi. Ukraina Qurolli kuchlarining qarshi hujumi haqida bir necha bor gapirgan Rossiya prezidenti Vladimir Putin dekabr oyi o‘rtalarida ukrainalik harbiylar «hech narsa qila olmaganini» ta’kidladi.