AQSh O‘zbekistondagi diniy erkinlik holatini ijobiy baholadi – Diniy qo‘mita

AQSh davlat departamenti O‘zbekistonni diniy erkinlik borasida ijobiy o‘zgarish qilmagan «Maxsus kuzatuvdagi mamlakatlar» ro‘yxatiga kiritmadi. Bu haqda O‘zbekistonning Din ishlari bo‘yicha qo‘mitasi ma’lum qildi. 

Qayd qilinishicha, AQSh davlat departamenti Kongress tomonidan 1998 yilda qabul qilingan «Xalqaro diniy erkinlik» to‘g‘risidagi qonunga dunyo mamlakatlarining qay darajada amal qilib borayotganini monitoring qiladi. Diniy erkinlik borasida ijobiy o‘zgarishlar amalga oshirilmagan mamlakatlar «Maxsus kuzatuvdagi mamlakatlar» ro‘yxatiga kiritiladi. 

Diniy qo‘mitaning ta’kidlashicha, O‘zbekiston mazkur ro‘yxatdan 2020 yilda chiqarilgan. Shuningdek, 2023 yilgi ro‘yxatga kiritilmagan. 

«4 yanvar kuni AQSh Davlat departamenti 2023 yil natijalariga ko‘ra e’lon qilgan rasmiy bayonotida O‘zbekistonning «Maxsus kuzatuvdagi mamlakatlar» ro‘yxatiga kiritilmagani ijobiy hol, albatta», deyiladi qo‘mita bayonotida. 

Davlat departamentining 2023 yilgi hisobotida Myanma, Xitoy, Kuba, KXDR, Eritreya, Eron, Nikaragua, Pokiston, Rossiya, Saudiya Arabistoni, Tojikiston va Turkmaniston «diniy erkinlikning o‘ta jiddiy buzilishiga yo‘l qo‘ygani» uchun «alohida tashvishli davlatlar» sifatida baholangan. 

Bundan tashqari, Jazoir, Ozarboyjon, Markaziy Afrika Respublikasi, Qamar orollari va Viyetnam diniy erkinliklarning jiddiy buzilishida ishtirok etayotgani uchun «maxsus kuzatuv ro‘yxatiga» kiritilgan.