Zelenskiy mamlakatni noqonuniy tark etgan ukrainaliklarni qaytishga va yordam berishga chaqirdi 

Ukraina prezidenti Volodimir Zelenskiy chet elga noqonuniy ketgan, safarbarlik yoshidagi ukrainalik erkaklar qaytib kelib, davlatga yordam berishi kerak, deb hisoblaydi. Bu haqda u Tallinda, Estoniya bosh vaziri Kaya Kallas bilan bo‘lib o‘tgan matbuot anjumanida ma’lum qildi. 

Zelenskiyga Estoniya harbiy yoshdagi ukrainaliklarni safarbarlik uchun Ukrainaga qaytarib yuborishi kerakmi, degan savol berildi. Bunga javoban prezident Rossiyaning keng ko‘lamli bosqinining boshida Ukrainani turli jins va yoshdagi aholi tark etgani, mamlakat rasmiylari bunga aralashmagani, chunki keyin nima bo‘lishini hech kim bilmaganini aytdi. 

Biroq, vaziyat o‘zgardi, dedi Zelenskiy, shuning uchun «safarbarlik yoshidagi ukrainaliklar, ayniqsa, mamlakatni noqonuniy tark etganlar qaytishi kerak». 

«Biz urush boshida yo‘qotilgan hududlarning 50 foizini qaytardik. Yigitlarimiz esa ikki yildan beri kurashmoqda. Ayni paytda esa chegarani qoidalar va qonunga zid ravishda kesib o‘tganlar bor. Agar ular safarbarlik yoshida bo‘lsa, Ukrainaga yordam berishi kerak va ular Ukrainada bo‘lishi kerak», dedi Zelenskiy. 

Ukraina rahbari so‘zlariga ko‘ra, vatanga yordam berish uchun frontga borish shartmas, boshqa yo‘llari ham bor. 

«Agar siz Ukrainada bo‘lsangiz va frontda bo‘lmasangiz, lekin ishlayotgan bo‘lsangiz - qayerda ishlashingizdan qat’i nazar, ishlasangiz va soliq to‘lasangiz, davlatni ham himoya qilasiz. Va bu juda zarur. Lekin siz chet elda bo‘lsangiz va safarbarlik yoshida bo‘lsangiz va frontda bo‘lmasangiz va soliq to‘lamasangiz va qonunga zid ravishda chegaradan o‘tgan bo‘lsangiz, unda savollar tug‘iladi», dedi Zelenskiy. 

Zelenskiy soliq to‘lash muhimligini, aks holda «harbiylar uchun pul bo‘lmasligini» ta’kidladi. 

«Agar pul bo‘lmasa, harbiy bo‘lmaydi, Ukrainani himoya qiladigan hech kim bo‘lmaydi. Bu hayot qoidalari», dedi u. 

Rossiya bosqinining davom etayotgani fonida Ukraina hukumati mamlakatda safarbarlik va harbiy ro‘yxatga olish qoidalarini qayta ko‘rib chiqishga qaror qildi. Safarbarlik to‘g‘risidagi qonun loyihasi Ukraina parlamentiga 2023 yil 25 dekabrda kiritilgan. Hujjatda, jumladan, chaqiruv yoshini 25 yoshga tushirish, elektron chaqiruv qog‘ozlari yuborish, shuningdek, xorijda istiqomat qiluvchi harbiy xizmatga majbur bo‘lgan ukrainaliklarni ro‘yxatga olishni joriy etish va chaqiruvdan qochganlar uchun cheklovlarni kuchaytirish taklif etiladi. Loyiha Ukrainada jamoatchilik noroziligiga sabab bo‘ldi va 11 yanvar kuni qayta ko‘rib chiqish uchun Vazirlar Mahkamasiga qaytarildi.