Prezident Qurolli Kuchlar tashkil etilganining 32 yilligi va Vatan himoyachilari kuni munosabati bilan tabrik yo‘lladi

Shavkat Mirziyoyev askar va serjantlar, ofitser va generallar, Qurolli Kuchlar faxriylariga, vatandoshlarga Qurolli Kuchlar tashkil etilganining 32 yilligi hamda Vatan himoyachilari kuni munosabati bilan tabrik yo‘lladi.

«Xalqimiz sizlar kabi mard va jasur harbiylarimiz timsolida Vatanni himoya qilishdek dunyodagi eng ulug‘ ishni sharaf bilan ado etib, Jaloliddin Manguberdi, Amir Temur, Bobur Mirzo singari buyuk ajdodlarimizning shonli an’analarini munosib davom ettirib kelayotgan ona yurtimizning chinakam qalqonlarini ko‘radi. Mana shu qutlug‘ ayyomda barchamiz sizlarning metin irodangiz, jangovar ruhingiz va shiddatingizga qarab, Vatanimiz mustaqilligi, xalqimizning tinch va osoyishta hayoti, sarhadlarimiz daxlsizligi mustahkam ishonchli qo‘llarda ekanini yanada chuqur his etmoqdamiz», deyiladi tabrik so‘zining boshida.

Prezident Vatan oldidagi burchini bajarish chog‘ida qahramonlarcha halok bo‘lgan botir jangchilarni yod etib, ularning o‘lmas xotirasi oldida ta’zim qilishini, ularning o‘rni, aziz xotirasi hech qachon yo‘qolmasligini ta’kidladi.

Shavkat Mirziyoyevning qayd qilishicha, bugungi kunda harbiy xizmatchilarning professional mahorati va obro‘-e’tibori jahon miqyosida yuksalib bormoqda. Buni mamlakat Qurolli Kuchlari vakillarining nufuzli xalqaro harbiy musobaqalarda faol ishtirok etib, faxrli o‘rinlarni egallab kelayotgani misolida yaqqol ko‘rish mumkin.

Prezident dunyo miqyosidagi hozirgi o‘ta murakkab vaziyatda mamlakat xavfsizligi va manfaatlarini ishonchli ta’minlash yanada dolzarb vazifa ekanini aytdi. «O‘zbekiston–2030» strategiyasida mamlakat xavfsizligi va hududiy yaxlitligini, jamiyatda tinchlik va totuvlikni ta’minlash, yurt mudofaa qobiliyatini yanada mustahkamlash va Qurolli Kuchlarni rivojlantirish masalalari ustuvor yo‘nalishlar etib belgilanganini eslatdi.

Shu asosda mamlakat harbiy-ilmiy va ishlab chiqarish salohiyatini kuchaytirish, Qurolli Kuchlarning jangovar shayligini oshirish, ularni zamonaviy qurol-yarog‘ va harbiy texnika bilan ta’minlash, qo‘shinlar faoliyatiga raqamli texnologiyalarni keng joriy etishga yanada ulkan ahamiyat qaratilishini ta’kidladi.

«Sizlarni bugungi qutlug‘ bayram bilan yana bir bor samimiy tabriklab, barchangizga mustahkam sog‘liq, oilaviy baxt, olijanob va mas’uliyatli faoliyatingizda ulkan zafarlar tilayman. Azmu shijoatli O‘zbekiston harbiylari – Vatanimiz posbonlariga shon-sharaflar bo‘lsin!», deyiladi tabrik so‘zi yakunida.