Andijonda ko‘p qavatli uyda yong‘in chiqdi. Bir kishi halok bo‘lgan

Andijon shahridagi ko‘p qavatli uylardan birida yong‘in chiqdi. Oqibatda bir kishi halok bo‘ldi, yana bir kishi jarohatlandi. Yong‘inga gaz-havo aralashmasining chaqnashi sabab bo‘lgan.

Foto: Videodan kadr

2 fevral kuni Andijon shahri Iqbol mahallasidagi 39-ko‘p qavatli uyning 61-xonadonida yong‘in sodir bo‘ldi, deb xabar bermoqda Andijon viloyati Favqulodda vaziyatlar boshqarmasi matbuot xizmati.

Shu kuni soat 18:13 da xonadonda gaz-havo aralashmasining chaqnashi sababli yong‘in yuzaga kelgani to‘g‘risida boshqarmaga xabar kelib tushgan.

Voqea joyiga 3 ta yong‘in-qutqaruv ekipajlari soat 18:18 yetib borgan, yong‘in soat 18:21 da to‘liq qurshab olingan, soat 18:27 da batamom o‘chirilgan.

Yong‘in oqibatida bir nafar fuqaro vafot etgan, yana bir kishi jarohat olgan.

Vaziyat FVV rahbariyati tomonidan to‘liq nazoratga olindi, deyiladi xabarda.