Rossiya prezidentligiga nomzod Boris Nadejdin to‘plagan imzolarning 15 foizi nuqsonli deb topildi 

Rossiya Markaziy saylov komissiyasi muxolif nomzod Boris Nadejdin uchun to‘plangan imzolarning 15,3 foizini nuqsonli deb topdi. Bu haqda siyosatchining shtab-kvartirasi xabar berdi. 

«Komissiya majlisi tugadi, hujjatlar olib ketildi. 15,3 foizi nuqsonli deb topildi. Oldinda uyqusiz ikki kecha. Saylov byulleteniga kiritilishi uchun tekshirilgan 60 mingta imzodagi nuqsonlar 5 foizdan ko‘p bo‘lmasligi kerak», deb yozdi shtab vakili Igor Artemiyev. 

«Rossiya Federatsiyasi prezidenti saylovi to‘g‘risida»gi qonunga ko‘ra, agar tasodifiy tekshirish paytida saylovchilar imzolarining umumiy miqdordan 5 foizi yoki undan ortig‘i ishonchsiz va haqiqiy emas deb topilsa, imzolarni tekshirish jarayoni to‘xtatiladi va nomzod ro‘yxatga olinmaydi. Boris Nadejdin bo‘yicha MSK qarori 7 fevral kuni e’lon qilinishi kerak. 

Avvalroq, Rossiya MSK jurnalist Yekaterina Dunsova to‘plagan imzolarni ham nuqsonli deb topib, uni prezidentlik saylovida qatnashishi uchun ro‘yxatga olmadi. U Ukrainadagi urushni to‘xtatish, demokratik islohotlar va siyosiy mahbuslarni ozod etish tarafdori ekanini e’lon qilgan edi. 

60 yoshli sobiq deputat Boris Nadejdin o‘tgan yil kuzidayoq prezidentlik saylovida qatnashishini aytib, kampaniya boshlagandi. Dekabr oyi oxirida «Fuqarolik tashabbusi» partiyasi uni nomzod sifatida ro‘yxatdan o‘tkazdi, Markaziy saylov komissiyasi esa imzo to‘plashga ruxsat berdi. 

Boris Nadejdin ham Ukrainadagi urush davom etishini qo‘llamasligini ochiq aytgan. U urush so‘zi o‘rniga ehtiyotkorlik bilan rasmiy lahjada qabul qilinganidek «maxsus harbiy amaliyot» iborasini qo‘llamoqda. Nadejdin uchun imzo to‘plash jarayonida uzundan-uzoq navbatlar yuzaga kelgan edi.