Tabiatga yetkazilgan zarar miqdori 618,1 mln so‘m ekani ta’kidlanmoqda.
Xorazm viloyati, Gurlan tumanida joylashgan «X.O.» fermer xo‘jaligi rahbari 81 tup daraxtni noqonuniy kesib tashlagani aniqlandi. Bu haqda Xorazm viloyati Ekologiya, atrof-muhitni muhofaza qilish va iqlim o‘zgarishi boshqarmasi xabar berdi.
Qayd qilinishicha, fermer xo‘jaligi rahbari N.X. tomonidan tabiiy holda o‘suvchi, biologik sog‘lom 81 tup turong‘il daraxti noqonuniy kesilgan. Oqibatda, tabiatga 618,1 mln so‘m zarar yetkazilgan.
Holat yuzasidan fermer xo‘jaligi rahbariga Jinoyat kodeksining 198-moddasi (Ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 2-qismi bilan jinoyat ishi qo‘zg‘atilgan. Bu modda bo‘yicha javobgarlik BHM 100 baravaridan 150 baravarigacha miqdorda jarima yoki 240 soatdan 300 soatgacha majburiy jamoat ishlari yoxud 1 yildan 2 yilgacha axloq tuzatish ishlari yoki 1 yildan 3 yilgacha ozodlikni cheklash yoxud 3 yilgacha ozodlikdan mahrum qilishni nazarda tutadi.
