Surxondaryoda ijtimoiy himoya uchun ajratilgan pullar o‘zlashtirib yuborildi

Qariyb 500 mln so‘m o‘zlashtirish yo‘li bilan talon-toroj qilindi.

Surxondaryo viloyatida ijtimoiy himoyaga muhtoj hamda davolanish va jarrohlik amaliyoti o‘tkazish uchun ajratilgan yordam pullarini o‘zlashtirgan bosh hisobchi aniqlandi.

Bosh prokuratura huzuridagi Departamentning Termiz shahar bo‘limi tomonidan o‘tkazilgan tergovga qadar tekshiruvda «Mahalla» xayriya jamoat fondi viloyat bo‘lim boshqaruvi bosh hisobchisi M.T. va boshqalar 2021-2022 yillar mobaynida «Saxovat va ko‘mak» jamg‘armasidan ijtimoiy himoyaga muhtoj hamda davolanish va jarrohlik amaliyoti o‘tkazish uchun 48 nafar fuqaroga yordam pullari berilgani to‘g‘risida soxta hujjat rasmiylashtirgan. Oqibatda, 499,8 mln so‘mni o‘zlashtirish yo‘li bilan talon-toroj qilishgan.

Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.