10:25 / 13.03.2024
8862

Sirdaryo tumaniga yangi hokim tayinlandi

Boyovut tumanidagi mahallada hokim yordamchisi sifatida ishlab kelgan Musurmonqul Hotamov Sirdaryo tumani hokimiga aylandi. 

Foto: Sirdaryo viloyati xokimligi

Xalq deputatlari Sirdaryo tumani kengashining navbatdan tashqari sessiyasida tumanga yangi hokim tayinlandi.

Sessiyada viloyat hokimi Akmal Mahmudaliyev kun tartibidagi masala yuzasidan qilgan ma’ruzasida tumanda yo‘l qo‘yilgan xato va kamchiliklarni sohalar bo‘yicha birma-bir tahlil qildi.

Shundan so‘ng viloyat hokimi Sirdaryo tumani hokimi lavozimiga tavsiya etilgan nomzod — Musurmonqul Hotamovni tanishtirdi.

Musurmonqul Hotamov 1986 yili Xovos tumanida tug‘ilgan. 2010 yilda Guliston davlat universitetini tamomlagan.

U faoliyati davomida Boyovut tumani, Shirin shahri va Oqoltin tumanida soliq organlarida turli lavozimlarda ishlagan. Tayinlovga qadar Boyovut tumani “Ijodkor” mahalla fuqarolar yig‘inida tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha hokim yordamchisi lavozimida ishlab kelayotgandi.

Viloyat hokimining Musurmonqul Hotamovni Sirdaryo tumani hokimi etib tayinlash to‘g‘risidagi qarori deputatlar tomonidan bir ovozdan tasdiqlandi.

  • Tumanga 2020 yil noyabridan buyon Botirjon Mirzaqulov rahbarlik qilib kelayotgandi. Uning ishdan ketish sababi ma’lum emas.
Top