«Uy-joy qurish hajmini har yili kamida 20 foizga oshirib borishimiz kerak» – prezident

Prezident Shavkat Mirziyoyev 12 mart kuni o‘tkazgan yig‘ilishida «Yangi O‘zbekiston» massivlari qurilishini jadallashtirish bo‘yicha topshiriq berdi. 

Davlat rahbari uy-joy narxi keskin oshib ketishining oldini olish uchun eng avvalo bozorda taklifni ko‘paytirish zarurligini ta’kidladi. 

«So‘nggi yillarda mamlakatimizda uy-joy qurish keskin ko‘paygani hisobiga quruvchilar ham, hokimlar ham katta tajriba orttirdi. Endi ular qurilish tannarxini pasaytirish va uylar sifati bilan qattiq shug‘ullanishlari vaqti keldi. Qaysi vazir yoki hokim uy-joy narxi oshishi sababi ichiga kirib, uning oldini olish bo‘yicha bosh qotiryapti?

Uy-joy narxi keskin oshib ketishining oldini olish uchun eng avvalo bozorda taklifni ko‘paytirishimiz zarur. Shu bois, viloyat hokimlari ikki hafta muddatda ko‘p qavatli uy-joylar qurish uchun qo‘shimcha 20 gektardan, Toshkent shahrida 60 gektar noqishloq yerlarni aniqlab, ikki oyda auksionga chiqarishi shart», dedi Shavkat Mirziyoyev.  

Davlat rahbari 1 iyulga qadar Yangi O‘zbekiston massivlaridagi 474 ta uy-joy qurilishini to‘liq yakunlab, foydalanishga topshirish bo‘yicha topshiriq berdi. Qoraqalpog‘iston Vazirlar Kengashi raisi Farhod Ermanov, Namangan viloyati hokimi Shavkatjon Abdurazzoqov va Surxondaryo viloyati hokimi Ulug‘bek Qosimovga qurilishi kechikayotgan 16 ta uyda qurilish ishlarini 10 kun muddatda boshlash bo‘yicha topshiriq yuklatildi.

«Ko‘rib turibsizlar, aholimiz soni tez o‘sib boryapti. Buning uchun shunga mos uy-joy, ijtimoiy va ishlab chiqarish infratuzilmasini barpo qilib borishimiz zarur. Agar biz odamlarni rozi qilamiz desak, uy-joy eng katta masala. 2024 yil ipoteka dasturi doirasida 80 mingta uy-joy qurish rejalashtirilgan. Bu juda kam. Oldimizga qo‘ygan ulkan marralarga erishish uchun uy-joy qurilishi hajmini har yili kamida 20 foizga oshirib borishimiz kerak. Buning uchun viloyat hokimlari budjet va bank puliga qarab o‘tirmasdan o‘zlari ham investitsiyalarni jalb qilib, renovatsiya loyihalarni amalga oshirishi kerak», deya ta’kidladi davlat rahbari.

Ta’kidlanishicha, bugungi kunda hududlarda 38 ta massiv qurilishi boshlangan. Joriy yilda yana 17 ta massiv bunyod etish ko‘zda tutilgan.

Farg‘ona viloyati hokimi Xayrulla Bozorov Farg‘ona shahri, Farg‘ona va Yozyovon tumanlarida «Yangi O‘zbekiston» massivlarini qurish boshlanib, 74 ta ko‘p qavatli uylar qurilishi yakuniga yetkazilayotgani, bundan tashqari, massivlarning o‘zida 75 gektarlik bog‘ qurilishi nihoyasiga yetayotganini aytib o‘tdi.

Hokimning so‘zlariga ko‘ra, xitoylik to‘rt nafar investor 170 mln dollarlik mablag‘ni uy-joy qurilishiga jalb qilishi belgilangan.

Yig‘ilishda uy-joylar qurilishi sohasidagi qator vazifalar belgilab berilgan.