O‘zbekistonda Telegram monetizatsiyasi ishga tushirilishi qonuniyligi o‘rganilmoqda

O‘zbekistonda Telegram monetizatsiyasi yo‘lga qo‘yilishining qonuniyligi o‘rganilmoqda, bu haqda Istiqbolli loyihalar milliy agentligi direktori birinchi o‘rinbosari Vyacheslav Pak ma’lum qildi.

Uning so‘zlariga ko‘ra, agar qonun buzilishi holati kuzatilsa, huquqni muhofaza qiluvchi organlarga xabar beriladi. Bunda qandaydir provayder yoki kimdir ularga bu borada yordam bersa, qonun bo‘yicha javobgarlikka tortiladi.

Shuningdek, Pak O‘zbekistonda Telegram ofisining ochilishi regulyatorga iste’molchilar huquqlarini himoya qilish va qonun buzilish holatlarida jazolash imkonini berishini ta’kidladi.

«Telegram O‘zbekiston qonunchiligiga, jumladan, qonunlarimiz va cheklovlarimizga rioya qilishi, soliq to‘lashi va mamlakatda serverlarga ega bo‘lishi kerak. Bu fuqarolarimizni himoya qiladi va O‘zbekiston iqtisodiyoti uchun ishlaydi», dedi u.

Avvalroq Telegram kanal egalari uchun monetizatsiyani ishga tushirgan edi. Unga ko‘ra, mingdan ortiq obunachiga ega ommaviy kanal egasi o‘z kanalida namoyish etilgan reklamadan tushgan daromadning 50 foizini olishi mumkin. To‘lov faqat raqamli kriptovaluta TON bilan amalga oshiriladi.

Monetizatsiya dasturi Rossiya, Ukraina, Falastin, Germaniya va Isroildan boshqa davlatlarda ishlaydi.