Toshkent viloyati hokimiga yangi birinchi o‘rinbosar tayinlandi

Erkin Madorbekovich Muhiddinov Toshkent viloyati hokimining birinchi o‘rinbosari etib tayinlandi.

Erkin Muhiddinov 1976 yili Andijon viloyati Andijon shahrida tug‘ilgan.  Ma’lumoti oliy, 1997 yili Andijon iqtisodiyot boshqaruv instituti, 2000 yili Bank-moliya akademiyasi, 2007 yilda Rivojlanayotgan iqtisodiyotlar instituti oliy maktabini (Yaponiya) tamomlagan.

U muqaddam kambag‘allikni qisqartirish va bandlik vaziri o‘rinbosari lavozimida ishlagan, 2023 yil avgustida Toshkent viloyati Ohangaron tumani hokimi lavozimiga tayinlangandi.

U yangi lavozimda Abdurasul Abdullayevning o‘rnini egalladi. Muqaddam Ohangaron tumani hokimi bo‘lgan Abdullayev 2023 yil avgustidan buyon viloyat hokimi o‘rinbosari edi. 

O‘z navbatida, Muhiddinov o‘rniga Doniyor Madirimov Ohangaron tumani hokimi etib tayinlandi.

Doniyor Mamatsaliyevich Madirimov 1979 yil Toshkent shahrida tug‘ilgan. Ma’lumoti – oliy. 1999 yil O‘zbekiston Milliy universiteti, 2019 yil O‘zbekiston Respublikasi Prezidenti huzuridagi Davlat boshqaruvi akademiyasini tamomlagan.  

D.Madirimov faoliyati davomida Toshkent shahar Statistika boshqarmasi, O‘zbekiston Respublikasi davlat statistika qo‘mitasida bo‘lim boshlig‘i, Shayxontohur tumani hokimining o‘rinbosari, Toshkent viloyati tashqi iqtisodiy aloqalar, investitsiya va savdo iqtisodiy boshqarmasi boshlig‘i, Sirdaryo viloyati hokimining o‘rinbosari, O‘zbekiston Respublikasi Investitsiyalar, sanoat va savdo vazirligi boshqarma boshlig‘i singari mas’ul lavozimlarda ishlagan.

Tayinlovga qadar Toshkent viloyati hokimining mahalliy sanoatni rivojlantirish masalalari bo‘yicha yordamchisi lavozimida faoliyat yuritayotgan edi.