Qoraqalpog‘istonda Cobalt pastlikka ag‘darilib ketdi

Katta tezlikda harakatlangan Cobalt yo‘l chetiga chiqib ketib ag‘darilgan, haydovchi halok bo‘lgan.

Foto: Videodan kadr

Qoraqalpog‘iston Respublikasi To‘rtko‘l tumanida sodir bo‘lgan yo‘l-transport hodisasida haydovchi halok bo‘lgan. Bu haqda respublika IIV axborot xizmati xabar bermoqda.

Ma’lum qilinishicha, 31 yoshli haydovchi Cobalt mashinasi bilan To‘rtko‘l tumanidan o‘tuvchi 4R-182 avtomobil yo‘lida katta tezlikda harakatlanayotib, boshqaruvni yo‘qotgan.

Shunda mashina yo‘l chetiga chiqib ketib pastlikka ag‘darilib ketgan. Oqibatda, haydovchi og‘ir tan jarohatlari olib, voqea joyida vafot etgan.

Qayd etilishicha, hodisa yuzasidan To‘rtko‘l tumani IIB tergov bo‘limi tomonidan surishtiruv harakatlari olib borilmoqda.