Tesla 2025 yilda Xitoy va Yevropa bozorlariga «avtopilot» tizimini olib kirmoqchi

Xorij bozorlari birinchi yarim yillikda Tesla daromadining qariyb yarmini ta’minladi, xususan, uning 20 foizi Xitoy hisobiga to‘g‘ri keldi.

Foto: Tesla

Amerikaning Tesla kompaniyasi regulyatorlar tomonidan ruxsat beriladigan bo‘lsa keyingi yildan haydovchiga yordam beruvchi Full-Self Driving (FSD, «avtopilot») tizimini Xitoy va Yevropa bozorlariga kiritishni rejalashtirmoqda.

Iyul oyida kompaniya rahbari Ilon Mask Yevropa, Xitoy va boshqa FSD (Supervised) joriy yil oxirigacha tasdiqlanishi kutilayotganini aytgandi. Hozirda tizimdan AQSh va Kanadada foydalaniladi.

Maskning so‘zlariga ko‘ra, Tesla ushbu tizimni boshqa avtomobil ishlab chiqaruvchilar bilan litsenziyalashni muhokama qilgan.

O‘z nomiga qaramay FSD mashinani to‘liq avtonomga aylantirmaydi va doimiy nazoratni talab qiladi. Xorij bozorlari birinchi yarim yillikda Tesla daromadining qariyb yarmini ta’minladi, xususan, uning 20 foizi Xitoy hisobiga to‘g‘ri keldi.

Aprel oyida Tesla Euro NCAP — Yevropada sotiladigan transport vositalarini sertifikatlashga mas’ul organ vakillariga FSD imkoniyatlarini namoyish etgandi. Undan oldin esa Ilon Mask FSD’ni harakatlanish chap tomonlama bo‘lgan davlatlar sharoitida Tesla elektromobillarini boshqarishga o‘rgatishini ma’lum qilgan edi.