Toshkent viloyati hokimiga birinchi o‘rinbosar tayinlandi

Otabek Tursunov Toshkent viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – viloyat iqtisodiyot va moliya bosh boshqarmasi boshlig‘i etib tayinlandi.

O.Tursunov 1984 yilda Andijon viloyati Andijon shahrida tug‘ilgan. Ma’lumoti – oliy. 2007 yilda Andijon muhandislik-iqtisodiyot institutini tamomlagan.

U mehnat faoliyatini Andijon shahar «Sanoat qurilish temp» MChJ ta’minotchisi vazifasidan boshlagan. Faoliyati davomida Iqtisodiy taraqqiyot va kambag‘allikni qisqartirish vazirligida mas’uliyatli lavozimlarda ishlagan.

Tayinlovga qadar Vazirlar Mahkamasi Iqtisodiyot, sanoat, moliya-bank, soliq, davlat aktivlari, tadbirkorlikni qo‘llab-quvvatlash va kambag‘allikni qisqartirish masalalari kotibiyati mudirining o‘rinbosari lavozimida faoliyat yuritayotgan edi.

Viloyat hokimi raisligida o‘tgan navbatdagi faollar yig‘ilishida Otabek Tursunov yangi rahbar sifatida tanishtirildi hamda kelgusidagi ustuvor vazifalar belgilab olindi.

Bundan oldin Toshkent viloyati hokimining birinchi o‘rinbosarlari lavozimidan ozod etilgandi.

Shavkat Mirziyoyevning so‘zlariga ko‘ra, Botir Alimbekov qishloq xo‘jaligidagi imkoniyatlardan foydalana olmagan, tayyor qilib berilgan tizimni ishlata olmagan. Viloyatda kambag‘allikni qisqartirish borasidagi ishlar ham qoniqarsiz deb topilib, viloyat hokimining boshqa bir birinchi o‘rinbosari Erkin Muhiddinov ham lavozimidan ozod etildi. Ularning ikkisi ham lavozimga shu yil tayinlangan edi.