Jizzaxda 8,6 mlrd so‘mlik elektr energiyasidan noqonuniy foydalangan “metan zapravka” aniqlandi

Jizzax viloyatida 8,6 mlrd so‘mlik elektr energiyasidan noqonuniy foydalangan “metan zapravka” fosh etilgan. Bu haqda “O‘zenergoinspeksiya” xabar bermoqda.

Ma’lum qilinishicha, “O‘zenergoinspeksiya” Jizzax viloyat hududiy boshqarmasi tomonidan o‘tkazilgan nazorat tadbirida Zarbdor tumanida joylashgan “R.G.M.” MChJga qarashli “metan zapravka”da elektr hisoblagich ko‘rsatkichlarini kamaytirish maqsadida ulanish sxemasiga tashqi ta’sir ko‘rsatilib, elektr energiyasidan noqonuniy foydalangani aniqlangan.

Ushbu qoidabuzarlik oqibatida dastlabki hisob-kitoblarga ko‘ra elektr ta’minoti korxonasiga 8 mlrd 677 mln so‘mlik zarar yetkazgani ma’lum bo‘lgan.

Qayd etilishicha, mazkur holat yuzasidan tegishli hujjatlar rasmiylashtirilib, huquqni muhofaza qiluvchi organlarga yuborilgan.