G‘ayrat Do‘stovga berilgan qamoq jazosi qisqartirildi. U sud zalidan ozod etildi

3 yanvar kuni jinoyat ishlari bo‘yicha Toshkent shahar sudi Do‘stovga berilgan 15 sutkalik ma’muriy qamoq jazosini 8 sutkagacha qisqartirdi va ushbu muddat o‘tab bo‘lingani uchun u sud zalida ozod etildi, deya xabar bermoqda Kun.uz muxbiri.

G‘ayrat Do‘stov 23 dekabrda Toshkent shahri Bektemir tumanidagi Oltintopgan ko‘chasi, 2-uyda joylashgan “Morotrans” MChJga qarashli gaz quyish shoxobchasida navbat kutib, navbati yaqin qolganda shoxobcha yopilganidan norozi bo‘lgan va shu vaqtda aytgan gaplari internetda tarqalgan edi.

Shundan keyin u 25 dekabr kuni qo‘lga olinib, 26 dekabrda Bektemir tuman sudi tomonidan mayda bezorilik moddasi bilan 15 sutka ma’muriy qamoq jazosiga tortilgan.

Do‘stovning 3 yanvar kungi apellyatsiya sudida aytishicha, u dastlabki sud qaroridan keyin “Panelniy”da faqat 1 kecha saqlangan, keyin poytaxt IIBBga olib borilgan.

Sudya Farruh Mahmudov raisligidagi apellyatsiya sudi dastlab javobgarning ishtirokisiz boshlangan edi, ammo advokatlarning talabiga asosan, G‘ayrat Do‘stov sudga olib kelindi. Sud jarayonida uning tobi qochgani sabab, ishni ko‘rishda biroz vaqt tanaffus bo‘ldi. Do‘stov o‘ziga kelgach, sud jarayoni davom ettirildi.