2032 yilda Yer bilan to‘qnashishi mumkin bo‘lgan katta asteroid aniqlandi

Astronomlar 2032 yil 22 dekabrda sayyoramiz bilan to‘qnashishi mumkin bo‘lgan 2024 YR4 nomli yangi asteroidni topdilar. Uning diametri taxminan 60 metrni tashkil qiladi va to‘qnashish ehtimoli 1/83 nisbatida baholanadi.

Obekt hozir Yerdan taxminan 43 million kilometr uzoqlikda. NASA hisob-kitoblariga ko‘ra, 2032 yilda u 106 ming kilometr masofaga - Oygacha bo‘lgan masofaning uchdan bir qismiga yaqinlashadi. Biroq, hisob-kitoblardagi noaniqliklar tufayli, trayektoriyaning to‘g‘ridan-to‘g‘ri to‘qnashuvga olib kelishi ehtimoli bor.

Agar asteroid atmosferaga kirsa, u 1908 yildagi Tunguska meteoritiga o‘xshash kuchli havo portlashiga olib kelishi mumkin. Shunda zarba to‘lqini 2 ming kvadrat kilometrdan ortiq maydondagi o‘rmonlarni vayron qilgan edi. Agar 2024 YR4 zichroq va temirga boy bo‘lsa, u yer yuzasida ulkan kraterni qoldirishi mumkin.

Asteroid allaqachon Yevropa kosmik agentligi va NASA tomonidan tuzilgan eng katta zarba xavfi bo‘lgan obektlar ro‘yxatida birinchi o‘ringa qo‘yilgan. Turin tahdid shkalasi bo‘yicha u 3 ball reytingga ega, ya’ni diqqat bilan kuzatuvni talab qiladi.

Ammo astronomlar vahima qilmaslikka chaqirmoqda. 2028 yilda u Yerga (sakkiz million kilometr masofaga) yaqinlashadi va bu olimlarga uning hajmi, tarkibi va trayektoriyasini aniqroq aniqlash imkoniyatini beradi.

Mutaxassislar to‘qnashuv ehtimolini aniqlash uchun fevral oyigacha kuzatishlarni davom ettiradi. Biroq, yakuniy xulosalar faqat 2028 yilga yaqinroq chiqarilishi mumkin.