Nukusda bog‘cha tarbiyachisi va yordamchisi bolalarni tepib, ularni shippak bilan kaltakladi

Nukusdagi bog‘chalarning birida tarbiyachi va uning yordamchisi bolalarga nisbatan qo‘pol munosabatda bo‘lgani yuzasidan tergovga qadar tekshiruv harakatlari boshlandi.

Ijtimoiy tarmoqlarda bog‘cha tarbiyachisi mashg‘ulot davomida bolalardan birini tepgani, yig‘lagan vaqtida sudragani tasvirlangan video tarqaldi. Yana bir holatda esa yig‘lagan bola tarbiyachi tomonidan shippak bilan kaltaklangan.

Qoraqalpog‘iston Respublikasi prokuraturasining ma’lum qilishicha, videolavhada aks etgan holat 2024 yil noyabr oyida Nukus shahrida joylashgan xususiy maktabgacha ta’lim tashkiloti tarbiyachisi R.Sh. va yordamchi tarbiyachi D.S tomonidan sodir etilgan.

Mazkur holat yuzasidan Nukus shahar prokuraturasi tomonidan tergovga qadar tekshiruv harakatlari olib borilmoqda.

«Natijasiga ko‘ra qonuniy qaror qabul qilinishi Qoraqalpog‘iston Respublikasi prokuraturasi tomonidan nazoratga olingan», — deyiladi xabarda.

Avvalroq Sergelidagi bog‘chada tarbiyachining qo‘pol munosabati oqibatida bolaning oyog‘i singandi. Bolaning ota-onasiga bog‘cha ma’muriyati tomonidan o‘g‘li o‘zi yiqilib oyog‘i singani va Sergeli tuman tibbiyot birlashmasiga olib kelingani to‘g‘risida xabar berilgan. Ammo kuzatuv kameralaridagi yozuvlar ko‘rilganida holat boshqacha bo‘lgani aniqlangan.