Zelenskiy: Myunxen konferensiyasi oldidan Ukrainaga Tramp jamoasidan «jiddiy odamlar» keladi

14-16 fevral kunlari bo‘lib o‘tadigan Myunxen xavfsizlik konferensiyasi boshlanishidan oldin Ukrainaga AQSh prezidenti Donald Tramp jamoasining vakillari tashrif buyuradi. Bu haqda mamlakat prezidenti Volodimir Zelenskiy ma’lum qildi.

Tramp ma’muriyati amaldorlarining tashrifi haqida Ukraina yetakchisi Yevropa investitsiya banki prezidenti Nadejda Kalvino bilan o‘tkazilgan qo‘shma matbuot anjumani vaqtida e’lon qildi.

Zelenskiy Ukraina va AQSh jamoatlarining umumiy maqsadi Putinni to‘xtatish hamda Ukrainaga qanday qilib xavfsizlik kafolatlarini berish ekanini ta’kidladi.

«Joriy hafta Myunxen konferensiyasi boshlangunga qadar Ukrainada prezident Tramp jamoasidan bo‘lgan ayrim jiddiy odamlar bo‘ladi. Keyin esa Myunxen konferensiyasi boshlanadi, uning doirasida qator uchrashuvlarim bor, jumladan, AQSh vitse-prezidenti bilan ham», — deydi Zelenskiy.

Ukraina prezidenti qanaqa «jiddiy odamlar» haqida gap ketayotganiga oydinlik kiritmagan.

Donald Tramp Rossiya va Ukraina o‘rtasidagi urushni to‘xtatishni prezidentlik dasturining asosiy bandlaridan biri deb atagan. Bloomberg manbalari Trampning Ukraina va Rossiya bo‘yicha maxsus vakili Kit Kellog urushni to‘xtatish bo‘yicha AQSh rejasini Myunxen xavfsizlik konferensiyasida taqdim etishini ma’lum qilgandi. Kellogning o‘zi bu xabarni rad etgan. Uning aytishicha, rejani Tramp taqdim etadi, ammo «bu keyingi hafta sodir bo‘lmaydi» (10-16 fevral).

Volodimir Zelenskiy 6 fevral kuni Trampning hozircha Ukraina—Rossiya urushini to‘xtatish bo‘yicha rasmiy rejasi yo‘qligini ma’lum qilgandi.

Avvalroq Kit Kellog AQSh Ukrainadagi urushni to‘xtatish uchun Rossiyaga qarshi sanksiyalar bosimini oshirishga tayyor ekanini bildirgan edi. Kellog hozirga qadar RFga nisbatan qo‘llangan cheklovlarni «10 balli shkalada uchga» baholagan. Uning hisoblashicha, Rossiya neftini qazib olish va eksportiga nisbatan sanksiyalar kuchaytirilishi mumkin.