Bukri kit odamni yutib yuborib, so‘ng tuflab tashladi - video

Chilida bukri kit 24 yoshli baydarkachini qisqa muddatga yutib yuborib, so‘ng tuflab tashladi, deb xabar beradi CNN.

Qayd etilishicha, mazkur hodisani baydarkachining otasi tasvirga olishga muvaffaq bo‘lgan. Magellan bo‘g‘ozida suv ostidan chiqib kelgan kit bir necha soniyaga Adrian Simankasni yutib yuborgan.

«O‘girilganimda yuzimda shilimshiq narsani his qildim, qora-ko‘k va oq ranglarni, ortimdan nimadir yaqinlashganini ko‘rdim. O‘sha onda men hech narsa qila olmasligimni, o‘lib ketishimni o‘yladim», — deya eslaydi Adrian.

Noaniqliklarga qaramay, yigit qutqaruv nimchasi uni yuqoriga ko‘tarayotganini his qilgan va bir necha soniyadan keyin esa yana suv yuzasiga qalqib chiqqan.

Adrianning otasi Dellning so‘zlariga ko‘ra, u «chiroyli to‘lqinlar»ni payqagan zahoti holatni tasvirga olishni boshlagan.

«Ushbu jonzot inson kattaligidagi o‘ljalarni ov qilmaydi», — deydi Vanessa Pirotta ismli olim.

Magellan bo‘g‘ozi o‘zining tabiati bilan mashhur turistik yo‘nalishlardan hisoblanadi. Delfinlar va ko‘k kitlar orasida baydarkada suzish — hukumatning turistik saytida reklama qilinadigan ko‘ngilxushliklardan biridir.