Elit OChL. «Paxtakor» Riaskosning dubli evaziga «As Sadd»ni mag‘lub etib, pley-offga chiqish imkoniyatini saqlab qoldi

OFK Elit Chempionlar Ligasida so‘nggi tur boshlandi.

Toshkentning «Paxtakor» klubi o‘z maydonida Qatar chempioni «As Sadd»ni qabul qilib, kolumbiyalik hujumchi Brayan Riaskosning dubli evaziga turnirdagi ilk g‘alabasini qo‘lga kiritdi va pley-offga chiqish uchun imkoniyatni saqlab qoldi.

E’tiborlisi, «sherlar» o‘z tarixida ilk bor «As Sadd»ni mag‘lub etishni uddalashdi.

«Paxtakor» ayni vaqtda 7 ochko bilan 12 jamoa orasida 7-o‘rinda (8 jamoa pley-offga chiqadi). O‘zbekiston vakili 1/8 finalga yo‘l olishi uchun turdagi uch o‘yinning kamida ikkitasida ularni qoniqtiradigan natija qayd etilishi kerak. Ya’ni:

— Bugun, 17 fevral kuni «Al G‘arafa» «Al Ahli»ga yutqazishi kerak;

— «Persepolis» «An Nasr»ni yuta olmasligi kerak;

— Ertaga, 18 fevral kuni «Istiqlol» «Ar Rayyan»ni mag‘lub etolmasligi kerak.

Elit OChL. 8-tur
Paxtakor — As Sadd 2:1
17 fevral. «Jar» stadioni
Gollar: Riaskos (18, 56) — Al Haydos (37, penalti).
Paxtakor — Jonatan, Hojiakbar Alijonov, Abdulla Abdullayev, Shahzod Azmiddinov, Umar Adhamzoda, Jonatan Lukka, Sardor Sobirxo‘jayev, Doston Hamdamov (Ulug‘bek Hoshimov, 80), Diyor Xolmatov (Abdurauf Bo‘riyev, 80), Flamarion (Otabek Jo‘raqo‘ziyev, 87), Brayan Riaskos (Bashar Resan, 72).
As Sadd — Ash Shib, Atal (Xidir, 80), Bunosir, Huhi, Al Yazidi (Abdulatif, 80), Unas, Gillerme (Sayyor, 32), Baqir, Al Haydos, Abdurisag (Muxika, 72), Kristo.
Ogohlantirishlar: Sobirxo‘jayev (49), Bunosir (55).
Chetlatishlar: Unas (65), Sobirxo‘jayev (68), Azmiddinov (90+9).