Senat chiqindidan qarzi bor fuqarolarga elektr to‘lovini cheklash haqidagi qonunni ma’qulladi

Senatda «O‘zbekiston Respublikasining ayrim qonun hujjatlariga chiqindilarni to‘plash va olib chiqish xizmatlarini ko‘rsatish sohasida to‘lov intizomini mustahkamlashga qaratilgan qo‘shimcha va o‘zgartirishlar kiritish to‘g‘risida»gi qonun ma’qullandi.

Qayd qilinishicha, ushbu sohada ko‘rsatilgan xizmatlar uchun to‘lovlarning o‘z vaqtida amalga oshirilmasligi oqibatida 600 mlrd so‘mlik debitor qarzdorlik to‘planib qolgan. Shu vaqtga qadar to‘lovni amalga oshirmagan abonentga nisbatan ta’sir choralari faqatgina sud tartibida amalga oshirilgan va u uzoq davom etgan.

Yangi qonun bilan Fuqarolik kodeksi, Uy-joy kodeksi, «Raqobat to‘g‘risida»gi va «Elektr energetikasi to‘g‘risida»gi qonunlarga qo‘shimcha va o‘zgartirishlar kiritilmoqda.

Unga ko‘ra endi qattiq maishiy chiqindilarni to‘plash va olib chiqish xizmatlari uchun majburiy to‘lovlar bo‘yicha qarzdorligi mavjud bo‘lgan iste’molchilarga SMS xabar yuboriladi. Shundan so‘ng mazkur qarzdorlik bartaraf etilguniga qadar iste’molchidan elektr energiyasi uchun to‘lovlarni qabul qilish vaqtinchalik cheklanadi. Bunda xizmat ko‘rsatuvchi tuzilmalar to‘lovlarni hisob-kitob qilishning ishonchli hamda to‘g‘riligini ta’minlashga mas’ul bo‘lishi belgilanmoqda.

Qonunga ko‘ra qattiq maishiy chiqindilarni to‘plash va olib chiqish xizmatlari uchun majburiy to‘lovlar bo‘yicha qarzdorligi mavjud bo‘lgan iste’molchilar uni bartaraf etsa, elektr energiyasi uchun to‘lovlardagi vaqtinchalik cheklashlar avtomatik ravishda bekor qilinadi.

Qonunning qabul qilinishi chiqindilarni to‘plash va olib chiqish bo‘yicha ko‘rsatiladigan xizmatlar uchun to‘lov intizomini mustahkamlash, xizmat ko‘rsatuvchi tashkilotlarning asosiy fondlarini yangilash va xizmatlar sifatini yaxshilash, ushbu sohaga tadbirkorlik sub’yektlarini jalb qilishga xizmat qilishi ta’kidlanmoqda.