Ispaniyada odam savdosi bilan shug‘ullangan yirik tarmoq fosh etildi

Ispaniya politsiyasi odam savdosi va ayollarni fohishalikka majburlash bilan shug‘ullanib kelgan jinoiy tarmoq faoliyatiga chek qo‘yilganini ma’lum qildi.

Politsiya ma’lumotlariga ko‘ra, oxirgi bir yil ichida mingga yaqin ayol ushbu tarmoq orqali o‘tgan. Operatsiya davomida 48 nafar ayol ozod etilgan.

Odam savdosida gumonlanib 48 kishi qo‘lga olingan, ularning uch nafari — ikki kolumbiyalik va bir ispan to‘da yetakchisi ekani taxmin qilinmoqda.

Jinoyatchilar jabrlanuvchilarni Lotin Amerikasidan, «asosan Kolumbiya va Venesueladan yollagan». Ularga Ispaniyada farroshlik yoki go‘zallik salonida ish taklif qilingan, ammo Ispaniyaga olib kelinganida ular fohishalik qilishga majburlangan, doimiy nazorat ostida ushlangan.

Eslatib o‘tamiz, 2024 yil may oyida Italiya politsiyasi Kalabriya mafiya tashkiloti «Ndrangeta»ga qarshi o‘tkazilgan reyd davomida 109 nafar gumonlanuvchini qo‘lga olgandi. «Ndrangeta» Italiyadagi eng qudratli zamonaviy mafiya guruhlaridan biri hisoblanadi. U qurol, odam va giyohvand moddalar savdosi bilan shug‘ullanadi hamda ko‘p milliard dollarlik aylanmaga ega.