Navoiyda 5 ta mashina ishtirokida YTH sodir bo‘ldi

Hodisa oqibatida hech kim tan jarohati olmagan. Holat yuzasidan surishtiruv harakatlari olib borilmoqda.

Foto: Ijtimoiy tarmoqlar

Navoiy viloyati YHXB Qiziltepa tumanida beshta transport vositasi ishtirokida sodir bo‘lgan yo‘l-transport hodisasi to‘g‘risida ma’lumot berdi.

Qayd etilishicha, 24 fevral kuni Qiziltepa tumani Toshrabot qo‘rg‘oni «Qal’ai Azizon» MFY hududidan o‘tuvchi davlat ahamiyatiga ega 4R-63 avtomobil yo‘lining 68-69-kilometrlar oralig‘ida N.U. ismli haydovchi Malibu rusumli avtomashinasida ichki ko‘chadan harakatlanib chiqayotib, birinchi darajali yo‘ldan kelayotgan Nexia-3 rusumli avtomashinasi bilan to‘qnashuv sodir etgan.

Natijada, ushbu mashinalar yo‘lning chekka qismida turgan Damas, Nexia-3 hamda Lacetti rusumli avtomashinalarga kelib urilgan.

O‘rganishlar davomida ushbu YHT oqibatida biror-bir fuqaro tan jarohati olmagani aniqlangan.

Hozirda holat yuzasidan Qiziltepa tuman IIB tomonidan dastlabki surishtiruv harakatlari olib borilmoqda.

Avvalroq Andijonda ikkita Nexia-2, Labo va SWM G01 transport vositalari ishtirokida avariya sodir bo‘lgani to‘g‘risida xabar berilgandi. Shuningdek, Toshkent shahrida ham Malibu-2, Cobalt, BYD va Onix transport vositalari ishtirokida yo‘l-transport hodisasi yuz bergan edi.

#YTH #Navoiy