Qishloq xo‘jaligi sug‘urtasi jamg‘armasi tashkil etiladi

Senat yalpi majlisida “Qishloq xo‘jaligi tavakkalchilarini sug‘urta qilish to‘g‘risida”gi qonun muhokama qilindi. Bu haqda Senat axborot xizmati xabar berdi.

Ma’lum qilinishicha, qishloq xo‘jaligi iqtisodiyotning eng tavakkalchi sohalaridan biri bo‘lib, iqlim o‘zgarishi, tabiiy ofatlar, zararkunandalar, bozor kon’yunkturasidagi o‘zgarishlar va boshqa xavf-xatarlar mahsulot yetishtiruvchilar uchun katta moliyaviy yo‘qotishlarga olib kelishi mumkin.

Tahlillar agrar tizimning ishlab chiqarish uzluksizligi va moliyaviy barqarorligini ta’minlashda xatarlarni boshqarishning eng samarali usuli sug‘urta ekanini ko‘rsatmoqda. Qishloq xo‘jaligi mahsulotlarini yetishtiruvchilar hosiliga zarar yetkazuvchi (tabiiy ofatlar oqibati) hamda nobud qiluvchi (kuchli yomg‘ir, do‘l, suv toshqini, dovul yoki zararkunandalar) omillar sabab jiddiy iqtisodiy zarar ko‘ryapti.

Sohada asosan kreditni qaytarmaslik xavfini sug‘urtalash amaliyoti keng foydalanilayotgan bo‘lsa-da, bunday sug‘urta faqat imtiyozli kreditlarning qaytarilishiga xizmat qilib, yetishtiriladigan hosil sug‘urtasiz qolib ketmoqda. Muhokama qilingan qonunda qishloq xo‘jaligi tavakkalchiliklarini sug‘urtalash bilan bog‘liq barcha masalalar va to‘g‘ridan to‘g‘ri amal qiluvchi normalar qamrab olingan.

Jumladan, ishlab chiqaruvchilarni turli tavakkalchiliklardan himoya qilish va barqaror daromad olishni kafolatlash uchun Qishloq xo‘jaligi sug‘urtasi jamg‘armasi tashkil etilishi ko‘zda tutilmoqda. Shuningdek, sohaning sug‘urtadagi yo‘qotishlarni baholash, sug‘urta hodisalari bo‘yicha yetkazilgan zarar miqdorini aniqlash mustaqil ekspertlar tomonidan amalga oshirilishi belgilanyapti.

Bundan tashqari, qishloq xo‘jaligi tavakkalchiliklarini sug‘urtalashda davlat tomonidan qo‘llab-quvvatlash mexanizmi yaratilmoqda. Xususan, sug‘urta mukofotining 50 foizi davlat tomonidan qoplab berilishi, sug‘urtalangan tabiiy ofatlar va boshqa xatarlardan ko‘radigan zararlarni qoplash uchun Qishloq xo‘jaligini sug‘urtalash jamg‘armasining mablag‘lari yetarli bo‘lmagan taqdirda uning qolgan qismi respublika budjeti mablag‘lari hisobidan qoplanishi nazarda tutilmoqda.

Qonun senatorlar tomonidan ma’qullandi.