O‘ttiz yil oldin Yaponiyadagi sekta Tokio metrosida zarin gazi ishlatib, terakt uyushtirgandi - fotosuratlar

1995 yil 20 mart kuni Tokio metrosida bir vaqtning o‘zida beshta bekatda jangovar zarin gazidan foydalangan holda terakt sodir etiladi. Uni Syoko Asahara boshchiligidagi «Aum Sinrikyo» apokaliptik sektasi uyushtirgan. 13 kishi halok bo‘lgan, mingdan ortiq kishi jabrlangan. Sekta rahbarlarining aksariyati hibsga olinadi, ulardan 13 nafari, shu jumladan Asahara qatl etiladi.

Syoko Asahara (haqiqiy ismi Tadzuo Matsumoto) 1987 yilda «Aum Sinrikyo» harakatiga asos solgan. U 32 yoshda edi, chaqaloqlikdagi kasallik tufayli deyarli butunlay ko‘r bo‘lgan, u an’anaviy tibbiyot bilan shug‘ullanishga, Hindistonga bir necha marta ziyoratga borishga va hatto dalay-lama bilan uchrashishga ulgurgan.

«Aum Sinrikyo» millenaristik sekta edi, ya’ni uning izdoshlari tez orada qiyomat bo‘lishiga tayyorlanardi. U buddizm, hinduizm va xristianlik elementlarini birlashtirgan. Xususan, Syoko Asahara o‘zini Iso Masih deb atagan.

«Aum Sinrikyo» diniy tashkilot sifatida ro‘yxatga olingan. Unga qarshi ommaviy kampaniya olib boriladi: sekta hokimiyatni egallab olish va ommaviy terror uyushtirishni rejalashtirishda ayblangan. Shuningdek, politsiya firibgarlikda gumon qilib surishtiruv ham o‘tkazgan: «Aum Sinrikyo» a’zolari ko‘chmas mulkni sotib olish uchun ko‘plab soxta firmalarni ro‘yxatdan o‘tkazishda gumonlangan. Keyinchalik ma’lum bo‘lishicha, sekta a’zolari bir necha kishini, jumladan, uni tark etishga uringanlarni, shuningdek, o‘z muxoliflarini o‘ldirgan.

1995 yil 22 martda politsiya «Aum Sinrikyo» shtab-kvartirasida tintuv o‘tkazishni rejalashtiradi. Syoko Asahara bu haqda oldindan ogohlantirilgandi. Huquq-tartibot idoralari e’tiborini chalg‘itish uchun u terakt uyushtirishni buyuradi. 20 mart kuni ertalabki tig‘iz vaqtda sekta a’zolari Tokio metrosining beshta bekatida zarin gazini ishlatadi.

«Aum Sinrikyo» dunyoning ko‘plab mamlakatlarida, jumladan, 1990-yillarda minglab tarafdorlari bo‘lgan Rossiyada ham terrorchi tashkilot sifatida tan olingan. Yaponiyada jinoiy ta’qibdan qutulib qolgan sektaning sobiq a’zolaridan ba’zilari yangi diniy tashkilotlar – «Alef» va «Hikarinova» («Dunyo doirasi»)ni tuzishadi. Ular terror va siyosiy ambitsiyalardan voz kechganini e’lon qilgan, bugungi kunda politsiya va maxsus xizmatlar nazorati ostida harakat qilmoqda.