“Qozonda 1 gramm go‘sht yo‘q” - Samarqanddagi davlat bog‘chasida bolalarga go‘shsiz ovqat berilmoqda

Samarqand viloyati Bulung‘ur tumanida joylashgan 11-sonli davlat bog‘chasida bolalarga go‘shsiz ovqat berilayotgani aytilmoqda. Kun.uz ixtiyoriga ana shunday iddao bitilgan video kelib tushdi.

“2025 yil 5 may kuni. Mana, qozonda 1 gramm go‘sht yo‘q. Juma, 2 may kuni ham go‘shsiz ovqat qilingan”, – deydi video muallifi bog‘cha oshxonasidagi qozonni ko‘rsatib.

U bolalar ovqatlanib o‘tirgan xonaga kirib, ularning kosalarini ham tasvirga olgan va shunday degan: “Bolajonlarning ovqatida go‘sht degan narsa yo‘q”.

Murojaatchi bolalar xonasida bir ayol (ehtimol, tarbiyachi) bilan gaplashgan, u ham 2 va 5 may kunlari go‘shsiz ovqat qilinganini tasdiqlagan. Ayol bog‘cha tarbiyalanuvchilari soni 194 nafar ekanini aytgan.

Murojaatchi, shuningdek, bog‘chaga tarkib jihatdan sigir sutidan olinmagan sariyog‘ olib kelinganini ham da’vo qilmoqda.

Maktabgacha va maktab ta’limi vazirligi Kun.uz so‘roviga javoban holat o‘rganilayotganini, qo‘shimcha axborot berilishini ma’lum qildi. Voqeani bolalar ombudsmani ham tekshirmoqda.

Amaldagi qonunchilikka ko‘ra, bog‘chada 1 yoshdan 3 yoshgacha bo‘lgan bolalar go‘shtning turiga qarab kunlik o‘rtacha 60/45 grammdan 80/60 grammgacha, 3 yoshdan 7 yoshgacha bo‘lganlar esa 80/60 grammdan 90/65 grammgacha mol, qo‘y, parranda va quyon go‘shtini iste’mol qilishi lozim.