Andijonda 6 ta mashina ishtirokida YTH sodir etildi

Andijon viloyati IIB Yo‘l harakati xavfsizligi boshqarmasi Shahrixon tumanida sodir bo‘lgan yo‘l-transport hodisasi yuzasidan ma’lumot berdi.

Qayd etilishicha, 3 iyun kuni soat 16:30 larda Shahrixon tumani Bekbachcha MFY hududidan o‘tgan A-373 xalqaro avtomobil yo‘lining 415-kilometrida yo‘l-transport hodisasi sodir bo‘lgan.

Toshkent—Andijon yo‘nalishi bo‘yicha harakatlanib kelayotgan 2 ta Cobalt, 2 ta Lacetti va bitta Nexia-3 svetoforning taqiqlovchi «qizil» ishorasida to‘xtab turgan vaqtida, oraliq masofani saqlamasdan harakatlanib kelgan Hyundai Porter ularning orqasiga urilgan. Ta’kidlanishicha, Hyundaiʼning 42 yoshli haydovchisi rulda chalg‘ib qolgani tufayli to‘qnashuv sodir etgan.

Hodisa oqibatida barcha transport vositalari texnik shikastlangan, tan jarohati olganlar yo‘q.

YTH yuzasidan Shahrixon tumani IIB YHXG xodimlari tomonidan surishtiruv ishlarini olib borilmoqda.