Qamchiq dovonida yuk mashinasi yonib ketdi

«Vodiy-Toshkent» yo‘nalishida harakatlangan IVECO rusumli yuk mashinasida yong‘in chiqdi. Hodisa oqibatida tan jarohati olganlar yo‘q.

Favqulodda vaziyatlar vazirligi Qamchiq dovonida sodir bo‘lgan yong‘in to‘g‘risida ma’lumot berdi.

Qayd etilishicha, bugun, 2 iyul kuni soat 20:55 da «Qamchiq» maxsus qidiruv, yong‘in-qutqaruv boshqarmasiga dovondan o‘tgan A-373 Toshkent—O‘sh avtomobil yo‘lining «Vodiy—Toshkent» yo‘nalishida harakatlangan IVECO rusumli yuk mashinasida yong‘in bo‘lgani to‘g‘risida xabar kelib tushgan.

Xabarga asosan «Qamchiq» maxsus qidiruv, yong‘in-qutqaruv boshqarmasi ekipajlari voqea joyiga yetib borgan va yong‘in to‘liq bartaraf etilgan.

Hozirda yong‘in sababi va moddiy zarar miqdori aniqlanmoqda. Hodisa oqibatida tan jarohati olganlar yo‘q.

«Qamchiq dovonida avtomobillarning ikki tomonlama harakati davom etmoqda», — deyiladi xabarda.