Kichik Chimyon tog‘ida yong‘in sodir bo‘ldi

Toshkent viloyatida Favqulodda vaziyatlar boshqarmasi Kichik Chimyon tog‘ida sodir bo‘lgan yong‘in to‘g‘risida ma’lumot berdi.

Qayd etilishicha, bugun 10 iyul kuni soat 19:32 da Toshkent viloyati FVBga Bo‘stonliq tumani «Burchimulla» o‘rmon xo‘jaligiga qarashli Kichik Chimyon tog‘ida quruq o‘t va shox-shabbalar yonayotgani to‘g‘risida xabar kelib tushgan.

Xabarga asosan, yong‘in-qutqaruv ekipajlari voqea joyiga yetib borgan va olov o‘chirilgan.

Yong‘in oqibatida dam olish maskanlari va aholi yashash xonadonlariga zarar yetmagan.

«Hozirda yong‘in sababi va zarari aniqlanmoqda. Holat oqibatida tan jarohati olganlar yo‘q», — deyiladi xabarda.

Avvalroq Bo‘stonliqdagi adirlikda yong‘in chiqqani, uni qurshab olishga salkam 2 soat vaqt ketgani to‘g‘risida xabar berilgandi.