Klasterlarning fermerlar oldida juda katta qarzdorligi bor - Qudbiyev

Sherzod Qudbiyev (o‘ngdan ikkinchi) / Foto: Soliq qo‘mitasi

O‘zbekistonda klasterlarning fermerlar oldida juda katta qarzdorligi mavjud. Natijada fermerlar soliq to‘lay olmayapti, xodimlariga oylik berolmayapti. Bu haqda 19 iyul kuni Savdo-sanoat palatasida to‘qimachilik sanoati vakillari bilan o‘tkazilgan ochiq muloqotda Soliq qo‘mitasi raisi Sherzod Qudbiyev ma’lum qildi.

“Kun tartibi uchun yana bitta masala – klasterlarning fermerlar oldidagi qarzdorligi. Mayli, [to‘qimachilik klasterlarining] davlat oldida qarzi bor, kredit qarzi bor, lekin fermerlarning oldida ham juda katta qarzi bor. Uning oqibatida fermer soliq to‘lamayapti, oylik berolmayapti, kreditini yopolmayapti”, – dedi Qudbiyev.

Yig‘ilishda ishtirok etgan iqtisodiyot va moliya vaziri o‘rinbosari Ahadbek Haydarov ham klasterlarning fermerlardan qarzdorligini tasdiqladi.

Eslatib o‘tamiz, o‘tgan yili iyulda paxta-to‘qimachilik klasterlarini moliyaviy sog‘lomlashtirish choralari e’lon qilingan edi.