Buxoroda elektr toki urishi oqibatida 2 kishi halok bo‘ldi

Buxoro viloyati, Buxoro tumani, Sheyxoncha mahallasida 2 kishi elektr toki urishi oqibatida halok bo‘ldi. Bu haqda tuman prokuraturasi Kun.uz’ga xabar berdi.

Baxtsiz hodisa 19 iyul kuni tunda sodir bo‘lgan. Sheyxoncha mahallasidagi yakka tartibdagi tadbirkorga tegishli nonvoyxona ishchilari qo‘lbola usulda yasalgan mo‘rining joyini o‘zgartirishga uringan. Ular mo‘rini yuqoriga ko‘tarishga harakat qilgan, shunda mo‘ri 3,5 metr balandlikdagi yuqori kuchlanishdagi elektr simiga tegishi oqibatida 4 nafar erkakni tok urgan. Ulardan ikki nafari tan jarohati oqibatida hodisa joyida vafot etgan. Qolgan ikki nafari tan jarohati olib, shifoxonaga yetkazilgan. Jabrlanganlarning ismi-sharifi tahririyatga ma’lum.

Holat bo‘yicha halok bo‘lgan fuqarolar murdasi sud tibbiy ekspertiza ko‘rigidan o‘tkazilgan hamda shifoxonaga yotqizilganlarga sudga oid tibbiy ekspertiza tayinlangan.

Buxoro tumani IIB huzuridagi tergov guruhi Jinoyat kodeksining 257-moddasi (Mehnatni muhofaza qilish qoidalarini buzish) 2-qismi «a» bandi bilan jinoyat ishi qo‘zg‘atilib, dastlabki tergov harakatlari olib borilmoqda.