Bolgariyada suvda cho‘kkan o‘zbekistonlik talabaning vafoti tasdiqlandi. TIV zarur choralar ko‘rmoqda

Bolgariyaning Sozopol shahrida cho‘milgani borgan 22 yoshli o‘zbek talabasi suvda oqib ketgani, yigitning tanasi bahaybat qoyatoshlar orasiga tiqilib qolgani va uni chiqarib olishning imkoni bo‘lmayotgani haqida Kun.uz xabar bergandi. Ma’lum bo‘lishicha, 9 soatlik qidiruv ishlaridan keyin qutqaruv xizmati xodimlari emas, balki talabaning o‘zbek, qirg‘iz va moldovalik do‘stlari uni qoyatosh ostidan topishgan.

O‘zbekiston TIV rasmiy vakili Ahror Burxonovning yozishicha, mamlakatimiz fuqarosi Bolgariyaning Sozopol shahrida vafot etgani haqidagi xabarni vazirlik chuqur qayg‘u bilan qabul qilgan.

“Marhumning oila a’zolariga chuqur hamdardlik bildiramiz. Ushbu ma’lumot kelib tushishi bilan, Bolgariya Respublikasini qamrab oluvchi Istanbuldagi Bosh konsulxonamiz bilan darhol aloqa o‘rnatildi. Hozirda diplomatlarimiz marhumning yaqinlari hamda Bolgariyaning tegishli davlat idoralari vakillari bilan hamkorlikda ishlamoqda”, deb yozgan vazirlik matbuot xizmati rahbari.

Ayni paytda vaziyat yuzasidan barcha zarur chora-tadbirlar ko‘rilmoqda, fuqaroning jasadini vatanga qaytarish ishlari muhokama qilinmoqda.