“Ijodni jamiyatga foyda keltirish vositasi sifatida ko‘rdim” - dekretda o‘z noodatiy biznesini yuritayotgan Aleksandra

Talabalik paytimda allaqachon turmush qurib, farzand kutayotgandim va ishlashni istardim. Menga bolaligimdan har qanday vaziyatda oʻzimga tayanish oʻrgatilgan. Talaba va bolali ayolni ishga olishga hamma ham tayyor emas, masofaviy ish esa hali keng tarqalmagan edi. Shuning uchun kiyim va mato boʻyash buyurtmalari ortishi fonida oʻz brendimni yaratishga qaror qildim. Menga bu jasoratni katta qizim baxsh etdi, shuning uchun brendni unga bagʻishladim, Fairy Fox – “Sehrli tulki” degani. Alisa – qizimning ismi, “lisyonok” (tulkicha) soʻziga mos. Mening tulkicham esa sehrli, chunki ertaklarni yaxshi koʻraman. Bu menga moʻjizalar, jasorat va ijodga muhabbat haqida kichik eslatma. Bu nomda hech qanday alohidalik yoʻqdek tuyilishi mumkin, lekin u men uchun juda qadrli.

Men akril, batik (matoni maxsus usulda boʻyab naqshlar tushirish) va akvarelni yaxshi koʻraman, lekin eng koʻp akril boʻyoqlari bilan mato va terida ishlashni yoqtiraman. Mavsumga qarab buyurtma turlari oʻzgaradi. Hozirgi paytda futbolka, kurtka, ryukzak, hamyon koʻproq buyurtma qilinadi. Kuz-qishda esa – svitshot, xudi, trench, jinsi kiyimlarga rasm chizdirish koʻp boʻladi.

Men har bir mijozga individual yondashaman va rasmni 100 foiz qayta takrorlamayman. Ayrim mijozlar oʻzlari uchun buyurtma qilgan rasmlarini boshqalarga qoʻllamasligimni soʻrashadi – men bu talabga doimo rioya qilaman. Hozirgi kunda koʻpchilik buyumni oʻzi olib keladi – bu ham menga maqbul, chunki inson oʻziga mos kiyimni tanlaydi. Kam hollarda men sotib olaman – ular asosan xorijga joʻnatiladigan buyurtmalar boʻladi. Ular odatda oddiy futbolka yoki oversayz svitshotlar boʻladi. Ishimni tugatishga buyurtmaning murakkabligi va detallariga qarab 3 dan 7 kungacha vaqt kerak boʻladi. Eng qiyin bosqich – dizaynni tanlash va mijozni tushunish. Men ishda ishonchga tayanaman, shuning uchun mijozga mening uslubim yoqishini tushunish juda muhim. Aks holda jarayon “yurmay qolishi” mumkin.

Daromadim bor, lekin hozircha kichik. Topganimning 30 foizini materiallarga sarflayman. Lekin men brendimni korporativ buyurtmalargacha olib chiqishni istayman. Eng muhimi – har bir buyurtmaga mehr bilan yondashishni saqlab qolish.
Menimcha, har bir rassom boshqasidan deyarli hamma jihatga koʻra farq qiladi. Men har bir ishimga qalbimning bir boʻlagini qoʻshaman. Rasmlarimda tuygʻu, kayfiyat bor. Avval qaraganda bilinmasligi mumkin, lekin sinchiklab qaralsa – seziladi. Men oʻzimga maʼqul boʻlmagan – haqoratli, siyosiy mavzularni olmayman. Eng katta farqim shundaki – men rang va uygʻunlikni yaxshi koʻraman.