“Ijodni jamiyatga foyda keltirish vositasi sifatida ko‘rdim” - dekretda o‘z noodatiy biznesini yuritayotgan Aleksandra

Талабалик пайтимда аллақачон турмуш қуриб, фарзанд кутаётгандим ва ишлашни истардим. Менга болалигимдан ҳар қандай вазиятда ўзимга таяниш ўргатилган. Талаба ва болали аёлни ишга олишга ҳамма ҳам тайёр эмас, масофавий иш эса ҳали кенг тарқалмаган эди. Шунинг учун кийим ва мато бўяш буюртмалари ортиши фонида ўз брендимни яратишга қарор қилдим. Менга бу жасоратни катта қизим бахш этди, шунинг учун брендни унга бағишладим, Fairy Fox – “Сеҳрли тулки” дегани. Алиса – қизимнинг исми, “лисёнок” (тулкича) сўзига мос. Менинг тулкичам эса сеҳрли, чунки эртакларни яхши кўраман. Бу менга мўжизалар, жасорат ва ижодга муҳаббат ҳақида кичик эслатма. Бу номда ҳеч қандай алоҳидалик йўқдек туйилиши мумкин, лекин у мен учун жуда қадрли.

Мен акрил, батик (матони махсус усулда бўяб нақшлар тушириш) ва акварелни яхши кўраман, лекин энг кўп акрил бўёқлари билан мато ва терида ишлашни ёқтираман. Мавсумга қараб буюртма турлари ўзгаради. Ҳозирги пайтда футболка, куртка, рюкзак, ҳамён кўпроқ буюртма қилинади. Куз-қишда эса – свитшот, худи, тренч, жинси кийимларга расм чиздириш кўп бўлади.

Мен ҳар бир мижозга индивидуал ёндашаман ва расмни 100 фоиз қайта такрорламайман. Айрим мижозлар ўзлари учун буюртма қилган расмларини бошқаларга қўлламаслигимни сўрашади – мен бу талабга доимо риоя қиламан. Ҳозирги кунда кўпчилик буюмни ўзи олиб келади – бу ҳам менга мақбул, чунки инсон ўзига мос кийимни танлайди. Кам ҳолларда мен сотиб оламан – улар асосан хорижга жўнатиладиган буюртмалар бўлади. Улар одатда оддий футболка ёки оверсайз свитшотлар бўлади. Ишимни тугатишга буюртманинг мураккаблиги ва деталларига қараб 3 дан 7 кунгача вақт керак бўлади. Энг қийин босқич – дизайнни танлаш ва мижозни тушуниш. Мен ишда ишончга таянаман, шунинг учун мижозга менинг услубим ёқишини тушуниш жуда муҳим. Акс ҳолда жараён “юрмай қолиши” мумкин.

Даромадим бор, лекин ҳозирча кичик. Топганимнинг 30 фоизини материалларга сарфлайман. Лекин мен брендимни корпоратив буюртмаларгача олиб чиқишни истайман. Энг муҳими – ҳар бир буюртмага меҳр билан ёндашишни сақлаб қолиш.
Менимча, ҳар бир рассом бошқасидан деярли ҳамма жиҳатга кўра фарқ қилади. Мен ҳар бир ишимга қалбимнинг бир бўлагини қўшаман. Расмларимда туйғу, кайфият бор. Аввал қараганда билинмаслиги мумкин, лекин синчиклаб қаралса – сезилади. Мен ўзимга маъқул бўлмаган – ҳақоратли, сиёсий мавзуларни олмайман. Энг катта фарқим шундаки – мен ранг ва уйғунликни яхши кўраман.